كود سبور//

كشف وليد الركراكي مدرب المنتخب الوطني المغربي على الطريقة اللي كيتعامل بها مع اللعابا ديال ليكيب ناسيونال، والسبب اللي كيخليهم يمسو ليه الصلعة ديال راسو كيف ما وقع من بعد ماتش كندا فدور المجموعات ديال كأس العالم ملي تأهلو لثمن النهائي.

وفتح وليد الركراكي قلبو فحوار مع موقع الاتحاد الدولي لكرة القدم الفيفا وقال: “راه هادشي كيبين العلاقة الزوينة اللي عندي مع اللعابا ديالي، كنحاول نكون قريب منهم والمهم كنحاول نبين ليهم بلي راني مؤطر ديالهم وقائد ونموذج ليهم وكنبغي نعطيهم بزاف ديال الحب، والأهم هو الاحترام اللي ما بيننا، ولكن فالتيران كاينين قرارات خاصني نديرها وغادي نديرها”.

وبخصوص الصلعة ديال راسو اللي كيبغيو اللعابا ديال المنتخب يمسوها، علق وليد الركراكي وكشف السبب وقال: “الصلعة ديال راسي ولات طريقة ديالي فتواصلي مع اللعابا وكنخليهم يمسوها باش تجيب ليهم الزهر، كايبان بلي فهمو الميساج وكلهم كيمسو ليا راسي وكنتمنى الصلعة تجيب لهم الزهر فالمستقبل”.