كود هناء ابو علي ///

ليلة احياء الملك محمد السادس لليلة المولد النبوي السبت اللي فات كان حدث كبير. ماشي على احياء الليلة. هادي الشي كيتكرر كل عام. بل على مستوى الشكل. حضور الملك بعد غيبة. غيبة سمحات للعدو والصديق يتساءل. تالف كيسول: فين الملك ووقتاش داخل.

كان خرج خبار ف”جون افريك” وماشي رسمي باللي سيدنا حدا والدتو اللي مريضة بزاف فباريس. لكن هاد الشي طول. الجزائريون دارو حملة كبيرة طلقو فيها كاع الاشاعات. كانت فيديوات من المغرب لسياسيين هدرو على غيبة الملك وكان اللي انتاقدها وزاد دوخ لمغاربة بحال اللي دار محمد زيان.

على هاد الشي كان ترؤس الملك لهاد الحفل السبت اللي فات بمسجد حسان بالرباط حدث كبير. حتى طريقة تسجيلو وتسويقو فصفحات كثيرة كان عندها مفعول.

الملك حضر وحضر معاه ولي العهد مولاي الحسن والامراء خوه مولاي رشيد اللي جاب معاه ولدو مولاي احمد وحضر ولد عم الملك مولاي اسماعيل.

شوفو غير كيفاش لمغاربة عبرو على فرحتهم بهاد الظهور فوسائل التواصل الاجتماعي. كلشي فرحان. ما كيقولوش راه رجع وراه وراه. اللا. فرحانين بهاد الظهور.

حتى التصاور اللي دارو لهاد الظهور عطاتو هالة خاصة. شفتو ديك الصورة ديال الملك وحداه ولي العهد =صورة المقال= قوية بزاف. بارطاجاوها بزاف. بينو حضارة المغرب وعراقتو وبينو الحضور الجسدي للملك.

دابا خاص هاد اللا ظهور للملك اللي كيخلي الاشاعات تكثر٬ يولي من الماضي. ما يمكنش لشعب كولو يبقى يتساءل على رئيس دولتهم ومقابل هاد الشي شعوب اخرى كتطلق اشاعات كثيرة علي ملكنا.

الميزاج العام بعد ظهور الملك فحفلة احياء عيد المولد النبوي للمغاربة تبدل. نشطو وفرحو. هاد الشي كيبان من خلال التدوينات من خلال تقاسم التصاور والاخبار والفيديوات.