أميمة عطية – كود كازا ///

غادي يمثل ولد وزير الصناعة والتجارة، رياض مزور، قدام المحكمة الابتدائية بتطوان، نهار 23 شتنبر 2026، فإطار أولى جلسات المحاكمة ديالو، بعدما تقرر متابعتو بتهمة إهانة بوليسي ، أثناء أداء مهمتو والعصيان، وإهانة هيئة كينظمها القانون.

وحسب المعطيات لمتداولة ، كان القاصر(ع. مزور) وقف قدام وكيل الملك لدى المحكمة الابتدائية بتطوان، قبل ما تتم إحالتو على قاضي التحقيق بالمحكمة نفسها، اللي قرر متابعتو فحالة سراح وتسليمو لولي أمرو ، فانتظار استكمال المسطرة القضائية وعرض الملف على أنظار المحكمة.

وللإشارة فقط ، فالقضية بدات فريسطو بمدينة تطوان، بعدما توصلات المصالح الأمنية بإشعار ديال مضاربة بين عدد من الشبان.

وعلى إثر هاد الإشعار، تدخل عنصر أمني كان قريب من المكان فمحاولة باش يهدي الوضع ويحافظ على الهدوء، إلى حين وصول عناصر النجدة.

غير أن التدخل الأمني، حسب المعطيات المتوفرة، تحول لمعيور واهانة ومضاربة مسيئة فحق موظفين عموميين كانوا كيقومو بمهامهم.

ودابا، مع تحديد 23 شتنبر المقبل كموعد لأول جلسة، غادي يدخل الملف مرحلة المحاكمة، باش تنظر المحكمة فالأفعال المنسوبة للقاصر، وسط احترام قرينة البراءة إلى حين صدور حكم نهائي.