كود سبور//

متبع شاكيل فان بيرسي ولد الأسطورة الهولندية فان بيرسي المهاجم القناص السابق ديال الأرسنال ومانشستر يونايتد، المنتخب الوطني المغربي.

تتبع شاكيل فان بيرسي لاخبار المنتخب الوطني المغربي عبر تطبيق أنستكرام، ما جاش بالصدفة حيث اللاعب الصاعد ديال فاينورد الهولندي هو من أم مغربية الاسم ديالها بشرى وهي زوجة اسطورة الكورة الهولندية فان بيرسي.

الأكثر من هذا ان شاكيل فان بيرسي متابع 2 من أكثر اللاعبين المغاربة الي تعرفو انهم رفضو يلعبو لمنتخبات بلدان تزادو فيها، والأول حكيم زياش اللي ضغطت عليه هولندا وبغات تغريه باش يلعب معها ولكن رفض وفضل المغرب، والآخر اشرف حكيمي اللي كانت باغيا إسبانيا تغريه وفضل حتى هو المغرب.

هذا المتابعة اللي داير الطفل شاكيل فان بيرسي مول 16 عام، للمنتخب الوطني المغرب على مواقع التواصل الاجتماعي، غيخلي كلشي المتتبعين ديال الكورة يتسناو يعرفو واش غيختار يلعب مع هولندا او مع المغرب.