كود سطات//
عاشت مدينة ولاد مراح فإقليم سطات، البارح السبت، على وقع فيضانات خطيرة، جات من مورا تساقطات مطرية قوية وغير متوقعة، خلات المدينة كلها غارقة فالما او خلفات أضرار مادية كبيرة او فرشات ضعف البنية التحتية ديال المدينة، بعدما دخل الما لديور الناس او صبحات الساكنة دايرا السطولة وتخوي فالما.
وحسب معاينة دارتها “كود” فالشارع الرئيسي ديال بلدية ولاد مراح تحول لبحيرة كبيرة، الما واصل للركبة، جوج طوموبيلات غارقين وسط الشارع، وحدة بيضة ووحدة حمرا ما بقا باين منهم غير السقف، والناس ما لاقينش منين يدوزو، واقفين غير فالقنوت كيتفرجو.
المحلات التجارية تسدات، والما دخل لديور ديال الناس، والخسائر المادية كبيرة، الساكنة كتقول بلي القوادس كاملين مبلعين ومسدودين بالزبل، والبنية التحتية فالمدينة ضعيفة بزاف، غير ساعة ديال الشتا كتغرق كلشي.
مصدر “كود”، قال بلًي واد فراح لي اللي دايز من وسط المدينة فاض عن آخره، الما جاي قوي وهايج وجايب معاه الحجر والزبل، والتيار كيخلع، القوة يالو تيضيف المصدر ديال “كود” هو أنه ملي تجمع الما فالواد او خرج لطريق وقطعها، قطع الطريق الرابطة بين راس العين وسيدي حجاج، وحتى الطريق الجهوية بين راس العين وسطات تقطعات، والطومبيلات وقفو حتى ترخف صبيب الواد عاد دازو.
دبا الساكنة ديال اولاد مراح تتطالب من الجهات المسؤولة باش تكون عندهم درسات سابقة لمواجهة خطر واد فراح ويسهرو المنتخبين على تنظيف قنوات الصرف الصحي حيت كانو سباب فهاذ الفيضانات. والجماعة خاصها دير حل نهائي ويخدمو البنية التحتية، ماشي كل مرة نبقاو نعانيو من هاذ المشكل.

