كود كازا ////

جريمة اخرى داروها لملايرية. هاد المرة بشاطئ سيدي رحال ضواحي كازا. برهوش هز الكاط كاط ودخل للشاطئ. بدا يلعب بيها ما تسوق لا للناس للي كاينين فالشاطئ لا للقانون. كثر من هادا هاد البرهوش كان كيسوگ بلا بيرمي. كان مفوت. طبعا هاد التهور ما يمكن يعطي الا جريمة. الجريمة ديال هاد البرهوش المتهور كانت طفلة صغيرة. دخل فيها ورسلها بين الحياة والموت. ضربها فالبحر. الطفلة اسمها غيثة. هاد الشي وقع نهار 15 يونيو 2025.

حسب منشور لوالدها فواحد من عائلة هاد البرهوش المرفح اللي ما مسوق لا للقانون لا حتى حاجة، قال ليه “حنا عندنا لفلوس”.

تصورو بنتك كتموت وواحد يجي يقول ليك ما معناه ما تصور والو. روح بنتك ما كتسوى والو وغاديين نشريو كلشي وما يتشدش ولدنا.

والد غيثة قال باللي باغي العدالة. العدالة كتبدى بتطبيق القانون على كلشي.

شفنا ولاد لملايرية ف”ملايرية النيك”. كانت فرنسية اتهمتهم بالاغتصاب ودارت امور كثيرة وتراجعات على اتهامها. كان فيها ولد بنيس مول “لابروفان” وولد شكيب لعلج ديال الباطرونا وولد شي حد اسمو السلاوي. دوزو شي ايام فالتحقيق وخرجو. دابا حتى متابعتهم باستهلاك المخدرات وامور اخرى غبرات. العبث صافي.

كانت حالة اخرى فيها ولاد لمرفحين منهم ولد شي خو الجامعي الطاشرون المعروف، شفرو البيض لشي سيد كيتمعش بيه وطلعو لوطوروت وبداو يضربو مستعمليها. شدوهم ومن بعد طلقوهم. تصورو كون شي فقير دار هاد الجريمة اش كانو غاديين يديرو ليه.

دابا من حق والد غيثة يخاف باش يعرف اش وقع فحالات ابطالها مجرمين باواتهم ملايرية.

والد الطفلة باغي العدالة. خاص العدالة تعطيه حقو. هادي 6 ايام وبنتو بين الحياة والموت فالصبيطار وكيتسنى “العدالة” فقضية بنتو