ݣود ـ مراكش//

قالت مصادر مطلعة لـ”كود” إن لابيجي بمراكش، أحالت اليوم الأحد 21 دجنبر 2025، جوج أشخاص على النيابة العامة لدى المحكمة الابتدائية، بعدما تشدو فملف ثقيل ديال النصب والاحتيال.

النيابة قررات متابعتهم فحالة اعتقال، وتوضعو فالسجن المحلي لوداية، فانتظار شنو غادي تقرر المحكمة فالقضية.

المعطيات اللي توصلات بها “كود”، كاتقول إن القصة بدات ملي فتحو المعنيين بالأمر وكالة بحي المحاميد فمقاطعة المنارة، وولاو كيسوّقو لأحلام وسط الشباب والشابات، بدعوى توفير فرص للدراسة فالصين .

المشتبه فيهم كانو كيتسلمو مبالغ مالية مهمة من الضحايا، وصلات حتى لـ60 ألف درهم للشخص الواحد، مقابل وعود بالسفر والتسجيل فمؤسسات تعليمية فالصين.

غير أن الواقع كان صادم، بحيث عدد من الضحايا ملي خرجو من المغرب، تبين ليهم باللي كلشي غير كذوب ونصب، وما كاين لا دراسة لا هم يحزنون.

أكثر من هاد الشي، لقاو راسهم عالقين فظروف صعيبة، شي فالصين وشي فدول أخرى بحال تايلاند، بلا أوراق وبلا فلوس، وبعضهم وصل حتى للتشرد فالزنقة.

القضية تفجرات بعدما تقدم والد واحد الطالبة بشكاية للبوليس، قال فيها باللي بنتو محبوسة فالصين وعايشة فحالة تشرد، بعدما طاحت ضحية الوعود الكاذبة ديال صحاب الوكالة.

هاد الشكاية حركات البوليس، اللي دار تحريات معمقة وقدر يوقف المشتبه فيهم، قبل ما يتحالو على العدالة باش تقول كلمتها فهاد الملف اللي صدم الرأي العام.