ݣودبني ـ ملال//

كان من المقرر تنظم، صباح اليوم الأحد، وقفة احتجاجية أمام المستشفى الجهوي ببني ملال دعاو ليها نشطاء فلفيسبوك للتنديد بتردي الوضع الصحي ونقص الأطر والخدمات. غير أن المشهد دار منعطف آخر: السلطات الأمنية حضرت بكثافة، والباشا كان في الموعد، لكن الجمهور ما بانش.

الوقفة اللي تروجت بزاف على الأنترنت واللي كان مفروض تعكس غضب الساكنة، تحولت فالميدان لساحة شبه خاوية، ما فيها غير رجال الأمن والقوات العمومية المرابطين تحسباً لأي طارئ.

هاد الغياب ديال المحتجين فتح بزاف ديال علامات الاستفهام: واش قرار المنع اللي صدر من طرف باشا بني ملال هو اللي حبس الناس وخلاهم يتراجعو؟ ولا أصلاً الدعوة ما لقاتش الصدى الكافي وسط الساكنة؟

فالأخير، ما ترفعات لا شعارات لا مطالب، السلطات لبات النداء والجماهير خلفات الموعد.