كود طنجة//

أصدر والي جهة طنجة تطوان الحسيمة، محمد امهيدية، قرارات بإيقاف عدد من رجال السلطة بسبب استفحال البناء العشوائي في مقاطعة بني مكادة بطنجة.

هاد المقاطعة كيترأسها واحد من كبار الأعيان فالمنطقة سميتو محمد الحمامي لي ترشح باسم حزب الاستقلال، وفالحقيقة هو ماشي استقلالي ولكن “كعكة” الانتخابات حطاتو فوق الميزان.

فهاد المقاطعة ماشي غير فوضى  فالبناء العشوائي لي كاينا، راه كاين تلاعبات خطيرة فالتعمير وهادشي فخبار وزيرة التعميرة فاطمة الزهراء المنصوري لي مزال مقدراتش تواجه الحيثان ومافيا العقار، وفخبار كذلك، نزار بركة أمين عام حزب الاستقلالي لي مخلي واحد بحال لحمامي كيسير هاد المقاطعة.

راه الفضيحة يكون واحد من المشتبه فيهم فالبناء العشوائي يترأس هاد المقاطعة العامرا بالاختلالات فالتعمير. وهو لي طيعطي الرخص، ورغم ذلك، نزار بركة عاجبو الحال يكون عندو بحال لحمامي اللي غير مؤخرا، عنف صحافي بطريقة بلطجية والملف بيد الأمن.

فهاد المقاطعة مبقاش فيها الوعاء العقاري لبناء المدارس، خواوه مافيات العقار ومبقاش فين يبنيو المدارس باش يقراو التلاميذ.