كود الرباط//

توصلت “كود” بمعطيات جديدة تخص استمرار الحبيب إمبراطورية بن الطالب في حفر الآبار بمناطق الحوز، حيث يتم حفر اليوم بئر جديد بإحدى فيرمات بن الطالب بجماعة سيدي عبد الله غياث عمالة الحوز.

وكشفت مصادر “كود” بلي المدير الجهوي لوكالة الحوض المائي تانسيفت، ورغم قرارات منع حفر الآبار بسبب استمرار الجفاف، بقي متفرجا أمام تغول بنطالب.

وحسب مصادر “كود” فإن المدير الجهوي لوكالة الحوض المائي، (تحت وصاية وزارة التجهيز والماء)، توصل بشكايات في الموضوع، لكن رفض يتدخل وقال بلي حتى الاثنين عاد يشوف، حسب مصدر “كود”.

عشرات الهكتارات ديال بن الطالب كتستفد من رخص حفر الابار، في حين ان العشرات من الفلاحين الصغار ممنوعة عليهم الرخص وضايعين بزاف.

وكان مصدر فلاحي -مهني- بإقليم الحوز، كان كشف لـ”كود” بلي عشرات البيار تحفرو بلا رخصة خصوصا وأن الدولة حبسات تعطي الرخص للحفر بسباب الجفاف تقريبا هادي مثر عامين، ولكن الغريب أن بطل هاد الحفير هو امبراطور الحليب الحبيب بنطالب وللي فنفس الوقت هو رئيس غرفة الفلاحة بجهة مراكش اسفي.

وحسب مصادر من منطقة الحوز، بن الطالب لي عندو المئات من الهكتارات ديال أراضي الجموع وأملاك الدول، كيحفر فيه الابار بدون رخص ف عدد المناطق منها جماعة سيدي عبد الله غياث ف عمالة الحوز. و حتى يلا عندو رخصة راها فضيحة كبيرة ف الوقت لي كيتمنعو الرخص بسبب الجفافا.

وفي منطقة الحوز، تقول مصادر “كود”، بلي بنطالب حفر العشرات من البيار بجماعة سيدي عبد الله غياث ويستغل الفرشة المائية بدون رقيب ولا حسيب، فوقت اللي كتنبه وزارة التجهيز والماء من استغلال الآبار وفالوقت للي الشرطة المائية تحركت على اكثر من صعيد وسجلت مخالفات بعدد من الأحواض المائية لي كتعرف استغلال الآبار بشكل غير قانوني.

وكانت السلطات قامت بتحرير العشرات من المخالفات المتعلقة بحفر الابار بمختلف مناطق المغرب، الا ان جهة مراكش بقات على حالتها. والاكثر من هادشي هو مول الفيرمات لي كيستفد من رخص الحفر هو رئيس الغرفة الفلاحية. وغير هادي فيها تضارب مصالح كبيرة.

فهادشي لي واقع، نزار بركة وزير التجهيز والماء، لي كيقول على راسو كيحارب الريع ويمنع الرخص ديال حفر الابار بلا رخصة، باقي كيتفرج ف امبراطورية بن الطالب. وبعض السياسيين كيستاءلو : واش بن الطالب غايمشي لحزب الاستقلال مقابل سكوت بركة عليه؟.