كود كازا ///

وسط حي “راسين” فكازا كاين مطعم معروف عند بيضاوا. اليوم لقيناه ساد. فاللول يسحاب لينا سيدنا غادي يجي تماك على قبال شي تدشين. كاين شي حد فالسلطات تماك. درنا تحرياتنا. لقينا فضيحة كبيرة. حسب مصادر “كود” شي مسؤول قالو كبير فكازا. جا ياكل تماك. ضراتو كلشو. لصقها فالتسمم وفهاد المطعم. عيط للعامل ديال انفا. سدو ليه.

واش ممكن فبلادنا يجي عامل يسد بلا خبار حتى والي الجهة؟ وشكون اصلا هاد المسؤول. سولنا “كود” واكتشفنا ان والي جهة كازا ما فراسوش هاد القرار

باش يتسد اي مطعم فاي بلاصة فالمغرب خاص تزورو لجنة مختلطة فيها من الجماعة ومن السلطات المحلية ومن البومبية ومن المكتب الوطني للسلامة الصحية للمنتجات الغذائية……

سولنا ف”كود” واش كانت شي زيارة لهاد المطعم. مصدر من هاد اللجنة قال باللي كانت زيارة. واضاف المصدر ل”كود” “صعيب تحديد اصل التسمم” وصعيب حتى نمسيوه واش تسمم ولا اللا. ما تقدرش تعرف”.

هاد المصدر تصدم بحالنا وقال باللي راه ما يمكنش يغلقو مطعم بلا ما يقول التقرير باللي خاصو يتغلق.

مصالح اخرى اكدات ل”كود” باللي “هاداك المطعم عندو كلشي قانوني وكيراعي شروط السلامة الصحية.

دابا سيدنا فكازا وواحد قايد او خليفة او رجل سلطة مخلي خدمتو وعاس على مطعم بدون سند قانوني غير شي حد كبير فكازا مرض. غير هو اللي مرض الباقي كلهم كالو تماك وما وقع ليهم والو. واش هاد الشي ماشي تفلية. ماشي ضرب لدولة الحق والقانون