كود كازا ///

توفي ليلة الاثنين الثلاثاء الناشر ورئيس الرجاء البيضاوي الاسبق عبد القادر الرتناني 77 سنة. رئيس الاتحاد المنهي للناشرين بالمغرب التابع للباطرونا كان مهووس بالطباعة والنشر. اسس ف1980 دار النشر المعروفة “ايديف” اللي غادية تسد لاسباب اقتصادية ف2003 بعدها اسس دار النشر “ملتقى الطرق”.

الرتناني اسم دخل تاريخ الرجاء واخا دوز على رئاسة هاد النادي غير 5 سنين من 1985 حتى 1989. علاش دخل هاد النادي للتاريخ ومعاه دخل حتى هو حقاش ففترتو وبسباب اختيارو للمدرب البرتغالي الشهير الراحل فيرناندو گابيرطا ربح اول بطولة للخضرا فموسم 1987/1988. كانت فرقة مزيانة ولكن مع رئاستو وهاد المدرب بداو يديو الالقاب. 

الرتناني غير ربح البطولة ومشى فحالو. حالة غريبة فتاريخ تسيير الاندية فالمغرب. فحديثو على ديك الفترة كيتكلم الرتناني بحنين كيفاش قدر يتحدى صعاب كثيرة باش يختار مدرب من حجم كابريطا وكيفاش كان يسير الخضرا. من بعد خدا مسافة كبيرة وركز على الثقافة.

ديك الرجا كانت خضرا ماية فالماية وكانو لعابة مزيانين. ها اللي داو البطولة: الحارس أيت صالح -رشيد جلاب- فتحي – موحيد – الصويب – القدميري -خاليف – الحمراوي – مساليك – ساليف – سعيد الصديقي

الالقاب الاخرى للخضرا ربحاتها بعد الاندماج مع جمعية الحليب اللي غادية تبدل اسمها باولمبيك البيضاوي ومعاها قدرو لعابة بحال جريندو ومماريس والسولامي …. بالاضافة الى اولاد المدرسة يديو بطولات محليا وافريقيا