كود الرباط//

عرفات السدود المغربية تحسّن ملحوظ فمستوى الملء هاد العام، بحيث وصلات النسبة الإجمالية لـ37.57 فالمية، حسب معطيات وزارة التجهيز والماء، بتاريخ 25 مارس 2025. وهاد الرقم كيمثل ارتفاع بـ11 فالمائة مقارنة مع نفس التاريخ من العام اللي فات، اللي كانت فيه النسبة ما كتجاوزش 26.52 فالمية.

وحسب نفس المصدر، المخزون الإجمالي ديال الما فالسدود بلغ اليوم 6.326 مليار متر مكعب، مقابل 4.275 مليار متر مكعب فـ2024، ما يعني فرق كيوصل لأزيد من 2 مليار متر مكعب، واللي كيعطي انتعاش للقطاع الفلاحي بعد سنوات من الجفاف.

وبخصوص وضعية الأحواض المائية، كنلقاو أن 5 من أصل 9 أحواض فالمغرب، تجاوزات نسبة الملء ديالها 50 فالمية، من بينها حوض اللوكوس اللي وصل لـ61.53%، وأبي رقراق بـ58.78%، ثم سبو بـ54.64%، وأم الربيع بـ52.99%.

أما الأحواض اللي مازال كتسجل أرقام ضعيفة، فبحال حوض سوس ماسة اللي ما وصلش حتى لـ31%، ودرعة واد نون اللي باقي بعيد على المعدل الوطني.

التحسن اللي تسجل فهاد الفترة كيرجع بنسبة كبيرة للتساقطات المطرية الأخيرة، وكيدفع لمزيد من الأمل خصوصاً مع اقتراب فصل الصيف اللي كيعرف استهلاك كبير للمياه، سواء فالفلاحة أو فالمجال الحضري.

لكن رغم هاد الانتعاشة، وزارة التجهيز والماء كتأكد أن الوضعية مازالت كتطلب ترشيد الاستعمال، ومواصلة مشاريع التحلية وإعادة استعمال المياه العادمة.