عفراء علوي محمدي- كود//

كشف معاذ المرابط، منسق المركز الوطني لعمليات الطوارئ الصحية فوزارة الصحة، أن هذ الأسبوع يقدر يعرف ارتفاع صاروخي غير مسبوق فعدد الوفيات بفيروس كورونا المستجد، بحكم أن الأسبوع اللي فات كان شهد ارتفاع كبير فالحالات والحالات الحرجة اللي دخلات لقسم الإنعاش، وهذا كيعني أن نسبة كبيرة منها يمكن تتوفى هذ السيمانة.

وزاد المرابط، فتصريح ل”كود”، كيقول أنه كلما ارتفعو الإصابات كلما بانو حالات حرجة كثيرة، وكلما تزادو الحالات الحرجة كلما كانو الوفيات كثار، وهذشي علاش ممكن السيمانة الجاية يطيحو فيها أرواح كثار بشكل يومي، وكثر من السابق.

أن المغرب انتقل للمرحلة الثالثة لانتشار الفيروس فعدة أقاليم، وفصل بالقول أن “المرحلة الأولى هي مرحلة تحديد الإصابات الواردة للمغرب، والمرحة الثانية فاش كيكونو إصابات ناجمة عن الزيارات العائلية فالعطل والأعياد، او فاش كتكون بؤر عائلؤة ومهنية فمراكز العمل، بينما المرحلة الثالثة هي فاش كينتشر الفيروس، وكيكون من السهل جدا وكاين احتمال كبير الإنسان يتلاقا الناس اللي فيهم فالشارع، واللي كيكونو كثار”.

وقال أن مجموعة من المناطق عرفات هذ الانتشار الجماعي، بحال كازا، والمحمدية والحسيمة ووجدة وبركان وخنيفرة ومناطق أخرى، والإنسان خاصو يدير حتياطاتو باش ماتزيدش تنتشر العدوى.