سهام البارودي ـ كود//

فاش سمعت الأغنية الجديدة ديال أسماء المنور وأصالة نصري “سيد الغرام” فرحت بزاف ! ماشي غير حيت الأغنية زوينة بزاف! ولكن حيت عشت حتى شفت النجوم المشارقة الكبار كايغنيو بالدارجة فحال ميريام فارس وبلقيس ودابا أصالة نصري.

انا كبرت فالتسعينات فالوقت لي كانت فيها مصر محتاكرة عالم الموسيقى! فالوقت لي كان فيها المغني باش يكبر ويتشهر خاصو ضروري يهز البكاج  ويمشي يتآنسطالا فالقاهرة ويغني بالمصرية ويكتبو ليه كتاب كلمات مصريين وينتج ليه منتج مصري باش يتشهر ويحقق النجومية! حيت إلى بقا فالمغرب غايبقا محصور فالشعبي والشيخات والراي وماغايسمعو حد من غير المغاربة !

ولكن بفضل هاد الجينيراسيون الجديدة د الفنانة المغاربة الأذكياء والقافزين والفخورين بالدارجة المغربية فحال سعد المجرد، منال، طوطو، حليوة، مهدي موزيان، إهاب أمير ودابا أسماء المنور ولات الأغنية المغربية عندها صدى كبير فالشرق! وماشي ضروري تغني بالمصرية باش تشهر وماشي ضروري تعيش فالقاهرة باش دير بلاصتك وسط النجوم !

اليوم گاع المغنيين المشارقة ولات عندهم موضة يغنيو بالمغربية باش يبانو “in” يبانو بلي ولاد الوقت والتران مافاتهمش! المصرية مابقاتش آلامود والخليجي الجمهور ديالو محدود! الدارجة خلقات بلاصتها نهار ولاد المغرب مابقاوش كايحشمو منها! نهار تصالحو الفنانة المغاربة مع اللغة ديالهم الأم وعطاوها فرصة… هانتوما كاتشوفو كيفاش حتى هي ولات لغة محبوبة ومطلوبة فعالم الفن! الدارجة لي كايهضرها وكايفهمها غير واحد ربعين مليون مغربي عبر العالم ولات كاتكتاسح لغات لي المتحدثين بيهم فايتين الميات مليون والصّرف !

هادشي باش كاتعجبني أنا هاد لانوڤيل جينيراسيون د المغاربة! عكس ليجينيراسيون القدام لي كانو عامرين عقد من لغتهم ومن بلادهم وحتى من أسماءهم، شحال من مغني فيهم مبدّل سميتو كاتلقى سميتو الحقيقية “عبد الجبار الكنبوشي” باه ذابح عليه حولي صردي وجوج نعجات وهو مسمي راسو “وائل الشريف” ويستقبلوه فش برنامج ويبقى يتأتأ و يتفتف بالمصرية مخضرة باللفت! لاجينيراسيون الجديدة لي وصلات الدارجة للعالمية ودارت أغاني مع مغنيين عالميين فحال ميتر گيمس !