كود – الجديدة //

فالوقت اللي البلاد داخلة فواحد المرحلة الانتخابية الحساسة، ومساحات الحركة والتجمعات كتولي محسوبة ، اختارت Electroplanet تجمع مسؤوليها وأطرها نهار 22 و23 شتنبر 2026 فـMazagan Beach & Golf Resort بالجديدة، فإطار Convention سنوية بشعار «Ensemble, transformons demain».

من حيث المبدأ، ما كاين حتى مشكل فشركة تنظم لقاء مهني داخلي،الـConvention جزء عادي من الحياة ديال المقاولات، خصوصاً الشركات الكبيرة اللي كتجمع أطرها ومسؤوليها لمناقشة الاستراتيجية والأهداف والمشاريع.

ولكن السؤال اللي كيطرح راسو هنا هو: علاش دابا؟علاش بالضبط 22 و23 شتنبر؟ وعلاش فهاد اللحظة اللي فيها البلاد عايشة على روينة ديال الانتخابات؟

المعطيات مكتبينش أن اللقاء عندو أي علاقة بالحملة الانتخابية،ولكن التوقيت، بلا شك، كيبقى عنصرا مشروع فطرح الأسئلة.

خصوصاً أن الأمر ما كيتعلقش بمقاولة صغيرة أو نشاط محدود. Electroplanet داخلة ضمن قطب التوزيع ديال Marjane Group، مع Marjane وMarjane Market وMarjane City، والمجموعة مرتبطة بدورها بـAl Mada الهولندينگ الملكي.

بمعنى آخر، ملي مؤسسة اقتصادية بهاذ الكبر كتجمع مسؤوليها وأطرها فمنتجع كبير مفطحين مع راستهم وفظرفية انتخابية حساسة فمن الطبيعي يبان السؤال: واش التاريخ غير صدفة؟ ولا كان مبرمج من قبل؟ ويلا كان اه،علاش متأجلش؟والسؤال اللي باقي معلق: علاش 22 و23 شتنبر بالضبط؟