اميمة عطية كود كازا //

معايير الجمال كتبدل من زمان لزمان. مؤخرا شي دراسات حاولات تشوف الموضوع من زاوية مختالفة: واش الشكل عندو علاقة مباشرة بالسعادة الزوجية؟

واحد الدراسة دارها قسم علم النفس فالجامعة الوطنية المستقلة فالمكسيك (UNAM)، بإشراف باحثين متخصصين، خرجات بنتائج مثيرة ، هاد الدراسة ركزات على تحليل سلوكيات عدد كبير من لكوبلات وتبعاتهم وتبعات التفاعل اليومي ديالهم.

وكشفت النتائج أن الرجال اللي متزوجين بعيالات غليظات كيعبرو على أعلى درجات ديال لفرحة والرضا مقارنة بخراين .

وكالت الدراسة أن هاد الرجال كيبانو أكثر ارتياحاً فحياتهم الزوجية، وكيعيشو نوع من الاستقرار النفسي داخل العلاقة.

لمعطيات اشارت باللي المرأة لعامرة ولا الدبدوبة، غالباً كتكون عندها قدرة أكبر على التعبير على المشاعر، وهاد الشي كيساهم فتعزيز التواصل بين الزوجين وتقليل الصمت والمشاكل.

وفيما يخص الخلافات، لاحظ الباحثون أن التعامل معها كيكون أكثر هدوء وكتكون ماشي معقدة ولكن مريگلة ونشايطية، وهادشي كيساعد على خلق جو عائلي متوازن.

وفسرات الدراسة هاد النتائج بزاف عوامل نفسية واجتماعية، من بينها أن الرجل مع شريكة عامرة عريضة كيحس بضغط أقل بخصوص المثالية الجسدية، وكيكون أكثر تقبلاً لراسو وللعلاقة.

كما أكدت أن الجو المرح والإيجابي اللي كيتربط فبعض الأحيان بالشخصية “لعامرة”، كيلعب دور فرفع مستوى الراحة داخل العلاقة.

وأضافت كذلك أن تقاسم لحظات بسيطة بحال الأكل والاستمتاع بالحياة اليومية بلا قيود، كيقوّي الروابط بين الزوجين