وكالات//

ولات الشركة الروسية الناشئة “نييري” أول شركة فالعالم اللي كتزرع أجهزة تحفيز عصبي فدماغ البقرات باش تزاد كمية الحليب، خصوصاً فالمزارع اللي سالاو فيها الطرق التقليدية.

من بعد ما علنات فـ أبريل اللي فات على هاد الخطة، دارت الشركة مؤخراً عمليات جراحية لـ 5 بقرات فجهة سفيردلوفسك فروسيا، وزرعات لكل بقرة جهاز تحفيز ورا الراس، مع إلكترودات كتوصل لمناطق محددة فالمخ.

الهدف من هاد الأجهزة هو أنها تحفّز مناطق فالمخ اللي كتحكم فـ الشهية، التوتر، والوظائف التناسلية، عن طريق نبضات كهربائية، حسب ما قال موقع “أوديتي سنترال”.

والموقع كيقول بلّي البقرات بقاو فايقين وقت العملية، وما بانش عليهم شي آثار جانبية، ورجعو بسرعة يخدمو فدورة الإنتاج ديالهم.

ورغم أن شركة “نييري” ما خرجاتش رسمياً أرقام على الزيادة فإنتاج الحليب، التقارير الأولية كتشير بلّي كاين تحسن ملحوظ.

دابا الباحثين خدامين على تطوير برامج تحفيز كتناسب الاحتياجات الجسدية ديال كل بقرة، بحال مثلاً واحد الوضعية كتخدم ملي الشهية كتضعف.

أليكسي ماريزا، اللي مستثمر فالشركة، كيقول بلّي هاد التقنية ممكن دير ثورة فصناعة الحليب، خصوصاً فالمزارع اللي ما بقاتش عندهم طرق أخرى يزيدو الإنتاج.

والباحثين كيزيدو يوضحو بلّي تحفيز الدماغ عن طريق الشرائح العصبية، ممكن يكون حل جديد يعطي ميزة كبيرة فالمنافسة.