مصطفى المزابي -كود سطات//

ساكنة سطات طالع ليها الدم مزيان بسباب الوسخ والريحة الخانزة لي قلبت لمدينة هاد الأيام، وصبحات كتشكل خطر على صحة الناس، خصوصا لمجاورين لمجرى المياه لي جاي من المصنع ديال الحوت، مول الفعلة، ولي غادي تأثر بشكل كبير على البيئة.

مصدر “كود” أكد بللي هاد الريحة الخانزة جايا من أوزين ديال الحوت للي كاين فالمنطقة الصناعية سطا بارك لي فالمدخل الجنوبي ديال مدينة سطات، ولقريب لمجموعة كبيرة ديال السكان ومملي طلع ليه الدم بسباب هاد الريحة الخانزة اتفقو على توقيع مجموعة من العرائض للي ارسلوها للمجلس البلدي والسلطات الإقليمية فالمدينة باش تخرج لجنة وتحبس هاد الريحة الخانزة .

مصدر من المجلس البلدي ديال سطات قال بللي هاد المصنع معندوش الرخصة وراه الرئيس صيفط مراسلة تحت إشراف السلطة المحلية ديال المدينة، ولي  تيقول فيها، أنه توصل بالعديد من الشكايات لي جات من المصانع والساكنة المجاورة لهاد لوزين وللي كتقول بللي هاد المصنع في الإنتاج او معندوش رخصة مزاولة هذا النشاط لي گلب الناس بالخنز او عليه راه خاص المصنع باش يسوي الوضعية الإدارية والقانونية ديالو.

هاد الشكايات دفعت السلطات الإقليمية باش تشكل لجنة للي مشات دارت زيارة لهاد المصنع لي معندوش الترخيص اودابا راه الساكنة تتسنى النتائج للي خرجات بها اللجنة.