گود سبور//

كشف وزير الخارجية السنغالي شيخ نينانگ ان بلادو بدات كتحرك وكادير محاولات مع المغرب باش ترجع السنغاليين اللي تحكمو فالرباط ابتدائيات واستئنافيا، بعد ادانتهم فأحداث الشغب اللي عرفها نهائي كاس افريقيا 2025، فتيران مولاي عبد الله بالرباط يوم 18 يناير 2026.

وكشف وزير الخارجية السنغالي خلال حوار على قناة RTS السنغالية، وقال: “دابا وبعدما سالات الإجراءات القانونية، ولات عندنا حرية وبدينا كانتواصلو مع الجانب المغربي، باش نلقاو احسن طريقة لحل هذه الأزمة اللي ولات ماتجاوز النطاق القانوني”.

وكمل وزير الخارجية السنغالي: “هادي مشكلة مؤلمة، والعائلات كايعانيو والرأي العام مبرزط، وكان سوء فهم كبير وهذا الشي مبرر”، زعما راه عارفين ان السنغاليين كاعيين على حكومة بلادهم حيث ما دارت والو فهاد الملف.

الوزير السنغالي قال ان الحكومة السنغالية خدامة على هذا الملف، وكاتطمن الشعب السنغالي، والمهم هو تحقيق نتائج ملموسة وان هذا الملف غادي يتطوى فالقريب.

للإشارة فثلاثة السنغاليين من الـ18 اللي تحكم عليهم بالحبس، خرجو اليوم السبت 18 ابريل 2026 بعدما كملو العقوبة السجنية ديالهم حيث تحكمو بـ3 شهور، إلى جانب فرنسي من اصل جزائري، ومازال 6 السنغاليين مشدودين فنفس الملف محكومين بـ6 شهور، و9 اخرين حتى هما مشدودين على نفس الملف بعام ديال الحبس.