كود الرباط//
أكد وزير العدل عبد اللطيف وهبي، بلي الوزارة كتوجد نصوص قانونية صارمة للحد خطورة انتشار السلاح الأبيض فالزنقة، وشدد باللي خاص التعامل بصرامة مع هاد الظاهرة.
وأكد وهبب فجلسة الأسئلة الشفوية فمجلس النواب، نهار الاثنين، فجوابو على سؤال ديال الفريق الحركي، أن الأحكام القضائية كانت صارمة، مع احترام استقلالية القضاء.
وهبي زاد وقال أن الحكومة دارت تعديلات على مشروع قانون المسطرة الجنائية، خصوصا المادة 303 مكرر، بحيث وسعات مفهوم السلاح وزادت فالعقوبات على اللي كيتحازو بيه.
وأكد الوزير أن الحوادث اللي وقعات بحال الشرطي لي فقد يدّو فـأكادير، والبنات الصغار لي تشوهات وجوههم، كلها أمور كتلزم تشديد العقوبات على هاد الجرائم. وشدد أن الحكومة غادي تواصل فالتطبيق ديال إجراءات صارمة ضد أي واحد كيهدد أمن المواطنين فالزنقة، وقال “هاد السلوك مكاين لي يبررو”.
وهبي شكر الأمن والدرك الوطني على المجهودات الكبيرة لي دايرينها، وأكد أن النيابة العامة والقضاء كيتعاملو بحزم، وقوات الأمن كتنفذ هاد التوجهات على أرض الواقع.
