كود – وكالات //

تقتل وزير الدفاع ديال مالي، الجنرال ساديو كامارا، فهجوم خطير بطوموبيل مفخخة ضربات دارو وسط القاعدة العسكرية فكاتي، حدّ العاصمة باماكو، الجنرال ساديو مات هو ومرتو وجوج ولادو صغار، جماعة نصرة الإسلام والمسلمين  (JNIM)، التابعة لتنظيم القاعدة، بالتعاون مع جبهة تحرير أزواد هما لي تبناو الهجوم فبلاغ خرجوه.

مصدر حكومي أكد هاد الخبر، وقال بلي مالي خسرات ساديو كامارا فالقاعدة العسكرية ”كاتي“، كامارا، اللي كان عندو 47 عام، كان من أهم الشخصيات العسكرية فالبلاد، وهو اللي لعب دور كبير فبناء التحالف بين باماكو وموسكو  وتحت الإشراف ديالو، خرجات القوات الغربية بقيادة فرنسا، ودخلات بلاصتها قوات ومتعاقدين فاݣنر، فخطوة بدلات التوازنات العسكرية فالمنطقة.

وتزاد ساديو كامارا فمالي، وقرا فالميادين العسكرية حتى ولى واحد من القيادات البارزة فالجيش حتى تعيّن وزيراً للدفاع، وكان معروف بالتزياؤ ديالو فالتدبير الأمني وبالقرب ديالو من صناع القرار فالنظام الحاكم، وكيتعتبر من الوجوه اللي كان عندها تأثير كبير فالتوجهات العسكرية والسياسية ديال البلاد فهاد السنوات الأخيرة.