الوالي الزاز -كود- العيون///

[email protected]

خضع وزير الثقافة الإسباني اللي من إئتلاف “سومار”، إيرنست أورتاسون، للضغوط ديال جبهة البوليساريو من بعد الاعتراف الصريح بمغربية الصحرا فمنشور الجريدة الرسمية فاش تم الإعلان على صفقة تجديد مدرسة “لاباص” فالعيون واللي وصفها الإعلان بالمغربية.

وزير الثقافة الإسباني، إيرنست أورتاسون، اللي كان كيهدر مع صحيفة “إل بوبليكو”، قال بأن “الصحراء الغربية ليست المغرب، والقانون الدولي قاطع في هذا الصدد”، مضيفا أنهم فإئتلاف “سومار” مع “تقرير المصير”.

وأشار أورتاسون فحديثو أن هداكشي اللي وقع فالجريدة الرسمية الإسبانية خطأ ووقع قبل ما يوصل هو يكون وزير الثقافة، مضيفا بأنه تواصل مع البوليساريو وضمن ليهم أن هاد الخطأ ما غاديش يتعاود والبوليساريو دابا عارفة هادشي، على حد تعبيرو.

وجوابا على سؤال بخصوص فتح معهد ديال “سيربانايس” فمخيمات تندوف، أوضح وزير الثقافة الصبليوني، إيرنست أورتاسون، أن هاد القرار كيرجع للإدارة ديال المعهد، وقبل الإدارة ديال معهد سيربانتيس كاينة وزارة الخارجية.

وأفاد وزير الثقافة فسياق تصريحاتو، أن اللي يقدر يدير هو تحسين الظروف المعيشية فمخيمات تندوف، أو الوصول إلى الثقافة، أو الدفاع من وجهة نظر ثقافية والبوليساريو عارفة هادشي.