فاطنة لويزا – كود//

شفت الفيديووات ديال بعض التدخلات ديال محمد سعد برادة وزير التربية الوطنية والرياضة في أشغال لجنة التعليم والثقافة في مجلس النواب، بمناسبة نقاش الميزانية الفرعية للتعليم، في إطار النقاش العام حول مشروع قانون المالية 2026.

دوك الفيديووات تسركلو بزاف فمواقع التواصل الاجتماعي، وعباد الله علقات على دوك التدخلات السوريالية، فمكانش حتى سبب باش نرجعو لداكشي، خصوصا ان الناس ركزات بزاف على اللغة العربية الضعيفة ديال الوزير.

بالنسبة ليا ماشي المشكل في اللغة، واخا زعما الوزراء خاص يديرو مجهود في تحسين اللغة ديالهوم، ماشي عاوتاني حتى الدارجة ما مقادة.

لا دارجة، لا تمازيغت.

ولكن إذا كان الوزير خدام، وعارف أش كيدير، بنادم يميك على نقطة اللغة، عطيني مسؤول واعر واخا يكون ضعيف في العربية، حسن ما تعطيني شي قيس سعيد، والفهامة الله يجيب.

محمد سعد برادة، دار خطأ تواصلي فاش مشا لبرنامج حواري فدوزيم.

ديك اللعبة ديال إذا خسرت في مواقع التواصل الاجتماعي، ندوز للإعلام العمومي ندير الريمونتادا.

التلفزة العمومية خاص تكون بالفعل خدمة عمومية، كتساهم في النقاش العمومي، ومفتوحة لجميع المتدخلين، ماشي لتبييض المسؤولين، راها ماشي شركة للتواصل تحت الطلب، وهذا موضوع يمكن نرجع ليه.

ولكن للأسف، لو كان سيفط شي مستشار ديالو كيفهم في التعليم، ربما كان يكون أحسن.

ماشي حيت هو مكيعرفش يتواصل، ولكن حيت ما فاهم والو فداك القطاع.

لو كان يدوي مثلا في الميزانية والأجور والبني ديال المدارس، كان ممكن يسلك راسو.

أش دخل شطاطتو في البيداغوجيا والمناهج والتعلمات؟ وهو ما فاهم والو فداكشي.

شكون هاد مساخط الوالدين لي كاذبين عليه، وقالو ليه بلي في الإعداديات في المغرب ديال المدرسة الرائدة كاين فريق بيداغوجي فيه الأساتذة والمفتش والموجه والمختص في الدعم الاجتماعي، كيتبعو أسبوعيا كل تلميذ متعثر، وكيديرو معاه لقاء أسبوعي.

راه الموجهين أصلا عددهم قليل جدا، وياربي غير يديرو التوجيه نحو التخصص الملائم، والمختصين الاجتماعيين مكاينينش في أغلب الإعداديات، وهاد العام أصلا حيدو المباراة ديالوم كاريمون، يعني ان الوزارة ديالو متجهة نحو إلغاء هاد الإطار وإدماجهوم إما في سلك التدريس، او في سلك الإدارة التربوية

وقاليك بهاد الطريقة غنقلصو الهدر المدرسي بالنصف هاد العام،

النبق إذا قلصتيه بخمسين فالمية هاد العام.

وزاد قاليك، هاد الإعداديات ولينا كنديرو فيهوم الأنشطة الموازية،ههههه

الأنشطة الموازية من ديما كدار في المؤسسات التعليمية، ماشي حتى جيتي أ الشريف ديالنا,

ولكن شنا هي هاد الأنشطة الموازية؟

ديك الشي على قد الحال، وكيبقى على حساب درجة تطوع الأساتذة، لي اغلبهم بعد سنوات من التطوع، كيحبسو، حيت ما كاين حتى تحفيز.

زيادة على مشكل استعمال الزمن لي عامر، ولي مكيخليش هامش للتلاميذ فين يديرو هاد الأنشطة، بلا مندويو على غياب فضاءات مناسبة للانشطة الموازية، حيت اغلب المؤسسات فيها فقط مكاتب الإدارة والأقسام وملاعب الرياضة بالسيما فقط.

سي الوزير، قاليك في الإعداديات عندنا الموسيقى والمسرح والسينما،، ههه

فين هادشي؟ ماكاينش حتى في المدارس الخاصة؟

وباش تعرفو بعيد على البيداغوجيا، فاش سولو على ان أولياء الأمور كيتشكاو من أن التلاميذ عدد الساعات عندوم بزاف ديال القراية، جاوبو بلي راه خاص نزيدو ماشي نقصو، حين خاص يستدركو ديك الشي لي فات.

يا ودي ، يا ودي،

الدعم التربوي، سعادة الوزير راه معندو حتى علاقة بزيادة السوايع، راه ماشي السوايع لي كتعرف ههه

الدعم التربوي عندو إجراءات ديالو، وديدكتيك ديالو، واهم حاجة فيه هو الإيقاع ديال التعلم، خاص يكون غادي مع القدرات ديال التلميذ، ماشي تشارجيه بالساعات

وزاد قال، بلي الآباء والامهات خاص ملي يجي التلميذ من المدرسة اول حاجة هي يقولولو نوض تقرا ههههه

في حين البيداغوجيات الحديثة، ولي معمول بها دابا في الدول المتقدمة، انه حتى الواجبات المنزلية ما بقاتش كتعطى، كلشي كيدار داخل المدرسة، أي بناء التعلمات الجديدة، والدعم والتقويم، باش من جهة التلميد يبقا ليه الوقت للهوايات ديالو لي هي جزء من بناء الشخصية، وحيت وهادا هو المهم، ان الآباء ماشي خبراء في البيداغوجيا والديدكتيك باش يقومو بمهام التدريس في البيت.

حنا طبعا مزال ما وصلنا لهاد النيفو، حيت أصلا معنداش مختصين في الدعم والتقويم، لي ممكن يقومو بهاد المهام في المدرسة، ومازال الأستاذ كيقوم بكلشي، التخطيط ديال الدرس، والإنجاز ديالو، والدعم، ثم التقويم.

سي سعد برادة، كيفتخر اننا كنديرو التقويم كل ستة أسابيع، راه مكاينش التقويم كل ستة أسابيع الشريف، كاين دعم التعلمات السابقة، والتقويم لي كيدار في بداية داك الأسبوع، راه ماشي امتحان بحال ما قلتي، راه تقويم تشخيصي، دياغنوستيك، ما كتعطاش عليه النقطة، غير باش الأستاذ يعرف فين كاين الخلل عند التلاميذ بزاف، ومن بعد كيقسمهوم على مجموعات على حساب فين عندوم المشكل.

برادة، قال بلي مشى لكازاخستان، لشي مؤتمر ديال اليونسكو، وفاش عرض عليهوم التجربة المغربية داخو، وكلشي بقا حال فمو.

شخصيا، بغيت شي حد يجيب لينا نص مداخلة السي برادة تماك، حيت واحدة من الزوج، يا إما قرا ورقة ديال شي دولة، يا إما دوك المستشارون ديالو ولا ديناصورات الوزارة كتبو ليه شي حاجة ديال الخيال العلمي تما.

راه الشريف، حتى المدرسة الرائدة لي مصدعنا بها، راه البيداغوجيات ماشي ديالنا، كيفاش غيحلو فامهوم خبراء التعليم في العالم.

المدرسة الرائدة كتخدم في أسابيع الدعم بتقنية سميتها: التدريس وفق المستوى المناسب، جيبناها من مكتب خاص بهندسة التعليم والتكوين كاين فالهندـ يعني شرينا البروجي من عندو، ولي هو أصلا بروجي موجه نحو الأماكن لي فيها هشاشة اجتماعية كتأدي لهشاشة تعليمية.

أما في أسابيع بناء التعلمات، كنعتمدو التعليم الصريح، وماشي التعليمة الصريحة كيما نطقتيها، وهاد التعليم الصريح راه جيبناه من كندا، ومعمول به فشلا دول ومقاطعات في الدول الفيديرالية منذ الستينات والسبعينات، وخبراء التربية عارفينو.

فاش هاد الناس انبهرو، واش بببيداغوجيا جاية من الهند، ولا لي جاية من كندا؟

واش عارف أش كتقول؟

قضية أخرى، قلتي بلي تقدم 200 ألف لمباراة التعليم كيعني القطاع عندو جاذبية،هههه

راه من ديما وهاد الاعداد كاينة، العام لي فات كانت 170 ألف حيت كان سقف السن هو 30، فاش تزادت 5 سنوات هاد العام، تزاد العدد ديال المرشحين، وإذا رجعتي قبل التسقيف كانت الأعداد كتفوت 300 ألف، مع العلم انه كان التعاقد وكانت الأجرة فقط 5000 درهم,

الأمر لا علاقة له بالجاذبية، عندو علاقة بالبطالة ديال حاملي الشهادات.

وعلى ذكر الأجر، دويتي باحتقار على أسرة التعليم، قلتي كيبداو بأجر 7000 درهم ومن بعد 15 عام كيوصلو ل 15000 درهم لي هو أجر المهندس.

لاش دخلتي المهندس فالهدرة، ولاش هاد التراتبية، هادشي سميتو حكرة.

خاص الأستاذ يدمر 15 عام باش يالاه يتقاد مع مهندس عاد بدا.

مع العلم أن الأستاذ من بعد 15 عام مكيشدش ديك 15 ألف درهم، كيشد حوالي 11000 درهم، حيت كيكون مزال موصل لخارج السلم، شكون هادا لي قال للوزير ان الأستاذ من بعد 15 كيكون خارج السلم، راه السلم 11 خاصك بين 13 و15 وعام، أما خارج السلم إذا كان عندك الزهر فمن بعد 22 ولا 25 عام ديال الخدمة، يعني باش يوصل لديك 15 ألف درهم كيكون ما بقالو على التقاعد غير شي 10 سنوات او أقل.

المهم شلا ما يتقال, من أمور ما غاديش يفهمها حيت بعيدة عليه.

نبقاو فلي ممكن يفهم فيه، هو المارشيات.

ياك حنا زعما كنقولو اللاتمركز، والجهوية الموسعة،

ولكن المارشيات الكبار ديال المعلوميات، وديال البني ديال المدارس والداخلياتـ وديال الكتب في إطار المدرسة الرائدة، وديال أوراق الامتحانات الموحدة، وشلا أمورـ علاش كيتم الإعلان على طلبات العروض مركزيا؟ واخا هادشي من االاختصاصات المفوضة للأكاديميات؟

واش الوزير فتح تحقيق في تركة الوزير السابق والوزراء السابقين فهادشي؟ ويشوف شكون لي كيتم رسو الصفقات عليهوم؟

عقل عليها اسي برادة، غالبا غنعاودو مع صفقات المدرسة الرائدة نفس سيناريو صفقات البرنامج الاستعجالي.