كود -الرباط //

رجّع موضوع الطواليطات العمومية للواجهة، وهاد المرة فالنقاش البرلماني على إمكانية استفادة الناس من مرافق الجوامع باش ينقص الخصاص اللي كاين فهاد الخدمة، هاد الموضوع اللي سبق طرحاتو “كود” ودار تفاعل كبير، وصل لمجلس المستشارين، وكانت وزارة الأوقاف متشدّدة فجوابها.

أحمد التوفيق، وزير الأوقاف والشؤون الإسلامية، قال فجواب كتابي على سؤال ديال المستشار خالد السطي من فريق الاتحاد الوطني للشغل فالمغرب، إن الطواليطات ديال الجوامع مبنية أساساً للمصلّين وفأوقات الصلاة فقط، باش يبقى الولوج منظم وما يكونش ضغط عليها.

الوزير شدّد أن توسيع الاستعمال ليشمل العموم يمكن يعرّض هاد المرافق لسوء الاستعمال، ويمسّ بنظافة الجامع، وزاد وقال إن تحويل هاد المراحيض للخدمة بمقابل كيخرّجها من طبيعة الوقف الديني اللي خاصو يبقى بعيد على أي نشاط تجاري.

ولكن هاد الموقف حسب المنتقدين، ما كيبانش مقنع وما كيتماشاش مع احتياجات المواطنين، خصوصاً أن البلاد غادي تستقبل آلاف الزوار فكأس إفريقيا وكأس العالم. المنتقدين كيشوفو أن رفض توسيع استعمال مراحيض المساجد بضوابط واضحة، هو تضييع لحل عملي كان يقدر يخفّف الأزمة، ويساهم فتدبير نفقات الجوامع، ويعاون يبقاو ديما نقيّين ومفتوحين، ويخلق حتى فرص شغل جديدة، بدل ما يبقاو مسدودين ومحدودين فالاستخدام بشكل فئوي ومؤقت.