كود الرباط//
كل المتتبعين للشأن السياسي وللعلاقات مع إسبانيا و لقضية الصحراء المغربية، استغربوا اليوم من حالة غير مسبوقة وخطيرة جدا متعلقة باستقبال عضو في حكومة اسبانيا لوفد عن جبهة البوليساريو.
الاستقبال كان في العاصمة مدريد في مكتب كاتب الدولة ناتشو ألباريس، المكلف بالحقوق الاجتماعية عن حزب بوديموس الذي ينتمي لليسار المتطرف. استقبال كان كبيرا جدا للمدعوة سويلة بيروك وزيرة الشؤون الاجتماعية والمرأة، في ما يسمى حكومة جبهة البوليساريو بتندوف. كاتب الدولة الإسباني فرحان بهاد اللقاء ونشر صوره في صفحته في تويتر قبل ما يحذفها.
الناس تساءلت عن السبب خصوصا أن السي ناصر بوريطة وزير خارجيتنا حتى هو فرحان بالعلاقات مع إسبانيا، مع أنها علاقات فيها حشيان الهضرة وضرب تحت الحزام وعرقلة مصالح المغرب. السي بوريطة تحدث على العلاقات مع جيراننا وقال بأن علاقات المغرب مع إسبانيا أحسن من علاقاتنا مع موريتانيا و الجزائر رغم أن هاد الدول شقيقة والملك مد ليهم يدو ويمكن في أي لحظة يرجعو مزيانين معنا كما في عهد الشاذلي بنجديد، و موريتانيا فعلا رجعت معها العلاقات زوينة منذ مدة خصوصا بعد انتخاب رئيس جديد.
السي بوريطة خاصو يفهم بأن في السياسة ليست هناك صداقة دائمة ولا عداوة دائمة بل مصالح دائمة. نهار تكون عندك مصالح قوية مع شي دولة تكون العلاقة زوينة بحال مع إسبانيا، ونهار تصطدم العلاقات تنوض العافية بحال قصة قانوني ترسيم الحدود البحرية ناضو لينا ف اسبانيا.
هاد النقص والضعف في التواصل ديال بوريطة اللي كيتعاود دائما، نوض علينا النحل وفيق الجبهات النائمة نسبيا مع الجزائر ومع بعض الموريتانيين، الأغبياء فقط اللي ينوضو جبهات متعددة ف وقت واحد حسب العلوم الإستراتيجية، هاد الضعف الكبير راجع إلى كون بوريطة ما دوزش المدرسة السياسية وما يعرفش يصرف مواقف المملكة كما ينبغي. السي بوريطة كان عليه يستافد من تكوين سياسي في شي حزب أو على الأقل يجيب ناس سياسيين متحزبين أو مارسوا السياسة يديرهم على جنبو، حيث غادي ينفعوه في التعامل مع مواقف كهاته، و ينصحوه كيف يتواصل سياسيا منين تنوض شي أزمة سياسية أو يتطرح شي سؤال سياسي. يتعاون مع السياسيين لأن الخارجية هي ديال كلشي المغاربة وهي مسألة سيادية ما خاصوش يسوقها بوحدو بعقلية موظف ديال زمان.
السي بوريطة خريج الوظيفة العمومية غالبة عليه النظرة التقنية الإدارية لملفات الخارجية، وهذا خطأ كبير، والنتيجة هجوم شبه رسمي من الحكومة الإسبانية من أهم مكون فيها وف التحالف ديالها، بوديموس، كيعطينا العصير وكيبين بأن السياسة الدولية ما فيهاش المحاباة، واخا السي بوريطة عطاهم حسن السيرة والسلوك مع المغرب بتصريحه هما كيردو علينا بالاعتراف بحكومة البوليساريو.
السي بوريطة عاود قرا سوارك، راه السياسة الخارجية و العلاقات الدولية ماشي علاقات خيرية أومجاملات وماشي فقاعات إعلامية والتقاط الصور، ولكن راها علاقات مبنية على القوة و على الواقعية اللي كيواجهنا بها خصومنا.