كود سبور//

أكدت سكينة وزراوي لاعبة المنتخب الوطني المغربي النسوي، أنها هي وصحباتها فليكيب ناسيونال بقيادة المدرب خورخي فيلدا واجدين لمواجهة زامبيا فالدور الرابع المؤهل إلى أولمبياد باريس 2024، واعتبرت أن هاد المواجهة مختلفة على آخر جوج ماتشات لعبوهم المنتخبين العام اللي فات وربحوهم الزامبيات، وقالت أن تألق المنتخب المغربي للسيدات فالسنوات الأخيرة، جا بالعمل ديال الجامعة الملكية المغربية لكرة القدم، واهتمام الملك المحمد السادس بكرة القدم النسوية والدعم ومساندتو لها.

وهضرت نجمة المنتخب المغربي النسوي وقالت فتصريح لموقع الاتحاد الإفريقي لكرة القدم على الماتشات بجوج ضد زامبيا: “هاد الجولة الإقصائية بحالها بحال أي جولة، ما دايرينش ضغط على ريوسنا، وكنعرفو المنتخب الزامبي مزيان، لعبنا معهم فسيبتمبر الماضي وخسرنا معهم فزوج ماتشات 2 لزيرو و6 لجوج، ولكن منتخبنا تبدل دابا، وعندنا طموح أكبر دابا، واللاعبات ديالنا تطورو، والحاجة الوحيدة اللي مؤكدين منها هي أننا مآمنين بريوسنا وغنتقاتلو حتا اللخر”.

وبخصوص المدرب خورخي فيلدا اللي تعين مدرب للمنتخب الوطني المغربي، قالت سكينة وزراوي: “عطى قوة للمنتخب، وكيبغينا نلعبو بشكل منظم بزاف ونلعبو مزيان، وكيبغي يشوفنا مسؤولات وقائدات والاستمتاع فاللعب”.

وبالنسبة للنهضة اللي كتعيشها كرة القدم النسوية المغربية، بعدما وصل المنتخب المغربي النسوي لأول مرة فالتاريخ ديالو لفينال كوب دافريك للعيالات وتأهل لأول مرة لكوب ديموند ووصل لثمن النهائي، ودابا قريب يتأهل لأولمبياد باريس لأول مرة فتاريخو، وضحت وزراوي: “دابا عندنا حلم آخر وهو التأهل للأولمبياد وخاصنا نحققوه، راه باش تكون من أحسن 12 منتخب فالعالم شي حاجة اللي واعرة بزاف، ومفخرة لبلادنا، ونبينو فين وصلت كرة القدم النسوية المغربية اللي كتطور باستمرار، وهذا الشي ثمرة العمل والمجهود ديال الجامعة الملكية المغربية لكرة القدم والملك محمد السادس، بدينا بكوب دافريك ووراه كأس العالم ودابا الألعاب الأولمبية، وخاصنا نأكدو أن كرة القدم النسوية المغربية عندها بلاصتها بين الدول الكبيرة”.

وبخصوص الگروب المحتمل يلعب فيه المنتخب المغربي للسيدات فحالة تأهل إلى اولمبياد باريس، وهو الگروب اللي فيه المريكان وألمانيا وأستراليا، قالت وزراوي: “هاد الگروب صعيب بحال گاع لگروبات ديال الألعاب الاولمبية، كاين غير 12 منتخب، ومستحيل تكون شي مجموعة ساهلة.. كنعرفو ألمانيا مزيان ولعبنا معهم فالمونديال (فوز ألمانيا 6-0) ودابا نضجنا واذا تلقينا معهم ما غنتعاملوش كيفما تعملنا المرة اللي فاتت”.