كود ـ وزان//

وقعت صباح اليوم الخميس فـ جماعة زومي التابعة لإقليم وزان حادثة خطيرة، بعدما تقلبات طوموبيل ديال النقل المدرسي كانت راكبة فيها أكثر من 40 تلميذ وتلميذة من أعمار مختلفة، فبلاصة معروفة باسم سوق أحد الجحرة. الواقعة خلات حالة من الخوف والهلع وسط الآباء وسكان المنطقة.

وحسب مصادر محلية، السائق فقد السيطرة على الطوموبيل وهو كيدوز من واحد المنعطف خطير، ورجحو أن السبب يكون يا إما السرعة الزايدة يا إما الحالة المزرية ديال الطريق.

الصور اللي خرجات من عين المكان كيبينو الطوموبيل منقلبة على جنب الطريق، ما بين الديور القروية، وقدّرات الأضرار تكون كبيرة فالمركبة، بينما التلاميذ تصابو بجروح مختلفة، منهم حالات خفيفة ومنهم اللي كانت إصاباتهم خطيرة شوية.

السلطات المحلية والدرك الملكي تحركو بسرعة ومشاو للمكان، ودارو اللازم، بحيث تنقلو المصابين للمستشفى الإقليمي بوزان باش يتلقاو العلاج، وبدات تحقيقات تحت إشراف النيابة العامة لمعرفة الأسباب الحقيقية ديال الحادث وتحديد المسؤولين عليه.

هاد الحادثة خلفات استياء كبير عند الساكنة، اللي طالبو من جديد بتحسين ظروف النقل المدرسي وصيانة الطرق القروية اللي ولات كتشهد بزاف ديال الحوادث، خصوصا فالمناطق الجبلية التابعة لإقليم وزان.