ݣود-العيون//

طلقات وزارة التعليم العالي رسميًّا، نهار السبت 29 نونبر 2025 فالداخلة، المنصة الوطنية الجديدة لتعلم اللغات“ELOGHA-SUP”، اللي تخلقات وتطوّرات بأيادي مغربية 100%. هاد المشروع جا فانسجام مع التوجيهات الملكية واستراتيجية الدولة باش ترفع من جودة التكوين الجامعي، وتقوّي السيادة الرقمية فتعليم اللغات، وتعطي بديل وطني حقيقي للمنصات الأجنبية اللي كيعتمد عليها الطلبة.

فالمرحلة الأولى، المنصة كتتيح تعلم 5 لغات: العربية، الأمازيغية، الإنجليزية، الفرنسية، والإسبانية، وكتخدم بالمعايير الدولية ديال الإطار الأوروبي المرجعي CECRL. وكتعطي أهمية كبيرة للإنصاف والإدماج، بحيث مجهزة بموارد موجهة للطلبة فوضعيّات خاصة، بحال درس بلغة الإشارة وبرايل. وزيد عليها، تقدم تجربة تعلم شخصية بفضل روبوت محادثة لغوي وأدوات ذكاء اصطناعي كيواكب كل طالب حسب المستوى ديالو.

والمحتوى ديال المنصة متنوع بزاف، حيث كتوفر أكثر من 2000 مورد تعليمي: كبسولات تفاعلية، بودكاست، تقييمات تكوينية، تدريب افتراضي VTS)). بالإضافة لتكوينات قصيرة من نوع MOOCs وSPOCs. الهدف هو يوفر للطلبة تجربة تعلم حديثة، سهلة، وشاملة، بجودة عالمية ولكن بمحتوى وطني متطور كيجاوب مع الاحتياجات ديال المتعلمين فالمغرب.