بغض النظر على شنو كان سياق تصريح بن كيران “بشحال كيعيش هاد السوسي گاع” واللي ماعندو غير معنى واحد في الاخير وهو ان  سواسة فقراء، واللي خداتها الأغلبية أنها تصريح عنصري، التصريح فيه حقيقة وماخصوش يتخاذ بشكل شخصي.

طبعا تصريح بحال هذا ما خصوش يجي من إنسان شاد منصب مهم ف دولة ما، ماشي باعتبارو عنصري، وإنما باعتبارو زلة لسان ساذجة غير موزونة وغير مدروسة العواقب، عكس ماهو مطلوب من السياسي المحنك، انه يقول فقط اش خاص يتقال بدون زيادة ولا نقصان لتفادي المشاكل والتأويلات اللي ممكن تضرب بمصالحو مستقبلا، لكن ونظرا لحالة الساحة السياسية ف المغرب، تصريح بن كيران ما خرجش عن المألوف وندوزوه لو بشريبة ديال الما، أغلب السياسيين المغاربة أصلا ضعيفي فن الخطابة وغير كيدبزوا ف خطاباتهم وتصريحاتهم لوسائل الاعلام، عكس السياسيين ف العالم الاول، أوباما مثلا، اللي تفرجت ف خطابو البارح كامل وما كرهتش كون زاد طول ساعة اخرى.

ملي وقع ما وقع لفتاتي إنزگان، اللي ولسخرية الاقدار كاينة ف سوس، خرجوا العلمانيين الفجار محبي الفاحشة في الارض تظاهروا إلكترونيا وعلى أرض الواقع وملئوا الدنيا ضجيجا حتى ربحوا القضية وحققوا اش بغاو. ومطالبهم ماكانتش فقط خاصة بالحادثة ولكن جمعوا قضية المرأة ككل وطالبوا بتحقيقها، ستغلوا قضية إنزگان فقط كشرارة أولى لإكمال نضالهم اللي طويل، بحال مثلا تجريم الاغتصاب الزوجي اللي مازال المغاربة كيعتبروه حاجة مبررة وعادية.

إختصار تصريح بن كيران ف الجانب العنصري، رغم أنني ما كنشوفش أنه قصد أي عنصرية ولكن لنفرض جدلا، هو رد فعل سطحي ساذج واغفال للموضوع الاعمق والاهم، إغفال للموضوع اللي فعلا كان خاص يتهضر فيه وينوض عليه الصداع، موضوع تدني مستوى معيشة سواسة والمغاربة بصفة عامة، خصوصا وأن قضية الفلوس مؤخرا شادة حيز كبير من السياسة المغربية.

البعض من بعد التصريح شداتو النفس على الطريقة القبلية وبدا يعدد ف عدد المليونيرات السواسة وكيفاش أن السواسة أغنى أغنياء المغرب وأن بن كيران غير كيخربق.

طبعا ما غاديش ننكر أن سوس فيها عدد من أغنياء المغرب وناسو المؤثرين، لكن اللي كيهم هنا هو مستوى معيشة الملايين من الطبقة المتوسطة والدنيا ف المغرب، ماشي حياة المليونيرات، حيت حتا دول إفريقيا اللي فيها المجاعة فيها مليونيرات كينعسوا على ريش النعام.

فعلا، السوسي العادي، وكيما قصد بن كيران، ما كيعيش بوالو وفقير وحياتو تعيسة. قبل ما تعدد ليا الأسماء وكيفاش أن درب عمر كلو سواسة، كنبغي نتير إنتباهك للعدد الهائل كذلك ديال سواسة اللي جايين من البلاد لكازا باش يخدموا على عائلاتهم ف الحوانت والمحلبات وكونسييرجات عند المليونيرات، واللي عدد منهم مازال كيخدم بأقل من ألف درهم للشهر ف ألفين وسطاش بدون عقد ولا أي حق من حقوق العامل، وكيضطر يعيّش عائلتو ويعيش هو.

هاد الفئة عددها ماشي قليل، وباقي سواسة حالتهم المادية ماشي بداك اليسر اللي كيظن البعض، لأن الحالة الاقتصادية لأغلب المغاربة أصلا متدنية، وسواسة ليسوا إستثناءا.

العلمانيين ممن يحبون أن تشيع الفاحشة في الأرض صدقوا مطورين على المناضلين الامازيغ وعرفوا يستغلوا قضية إستثنائية عابرة من أجل قضية أكبر وأهم ودسوا “سمومهم” بالعسل، عكس الجيش العرمرم ديال اللي قلقهم تصريح بن كيران اللي دخلوا ف المناوشات العنصرية اللي لا تغني ولا تسمن من جوع، بدل ما يستغلوا الفرصة للمطالبة بتحسين أوضاع الاف الاسر السوسية اللي كتتضارب مع الوقت باش تعيش وحتا واحد ما ف جنبها.

شخصيا ورغم انني ماشي سوسي، كنتفق مع بن كيران ف تصريحو، آه السوسي ما كيعيش بوالو، وكنبغي نسولو بهاد المناسبة من هاد المنبر: شنو حل سعادتكم كرئيس حكومة ديموقراطية لهادشي؟