كود ورزازات//

قالت مصادر مطلعة ل “كود” أن غرفة الجنايات الابتدائية فمحكمة الاستئناف بورزازات أجلات أول جلسة ديال محاكمة المتهمين فالقضية اللي معروفة بإسم “فضيحة محل التدليك”، واللي كانت هزّات الرأي العام المحلي فالسيمانة الثانية من نونبر اللي فات.

المحكمة حددت 18 دجنبر كموعد جديد باش يتم إعداد الدفاع ويتم استدعاء المصرحين والشهود.

القضية كايتابعو فيها ثلاثة ديال المتهمين بتهم ثقيلة. فصاحبة المحل متورطة فمجموعة ديال المتابعات، منها: التغاضي على ممارسة الدعارة بشكل مستتر ومعتاد، العنف، عدم التبليغ عن جناية، الاتجار بالبشر، توفير محل ماشي مخصص للعموم لاستعماله فالدعارة، المشاركة فإجهاض مرا حاملة، والحصول على رسم ولادة بشكل غير قانوني باستعمال تصريحات كاذبة.

أما المكلف بتسيير المحل، فحتى هو كيتابع بتهم خطيرة بحال: الاغتصاب، التغاضي على الدعارة، العنف، المشاركة فخيانة زوجية، الاتجار بالبشر، وضع محل رهن إشارة الغير مع علمه باستعماله للدعارة، والحصول على رسم ولادة باستعمال معلومات مغلوطة.

المتهم الثالث، اللي كيوصفوه كوسيط، كيتابع على أساس المشاركة فالاتجار بالبشر، التحريض على الدعارة، الإخلال العلني بالحياء، المساهمة فإعداد محل للدعارة، والوساطة فالبغاء.

توقيف هاد المشتبه فيهم جا من بعد تدخل ديال عناصر المصلحة الجهوية للشرطة القضائية فورزازات، اللي فتحو تحقيقات تحت إشراف الوكيل العام للملك بعدما شكو فاستغلال محل للتدليك والتجميل فأنشطة غير قانونية كتدخل ضمن الاتجار بالبشر.

القضية مازالت كتشعل النقاش فجهة درعة-تافيلالت، والأنظار كلها موجهة للجلسة الجاية نهار 18 دجنبر.