كود – وكالات//

فأعماق الغابات ديال تايلاند، فين الضو ديال الشمس كيوصل غير بزز لارض المغطية بالأوراق، لقاو علماء النبات واحد النبتة وغريبة لدرجة أنها كتبان بحال إلا خارجة من فيلم ديال الرعب.

النبتة سميتها Thismia daemona، والباحثين سموها «زهرة الشيطان». الزهرة ديالها صغيرة وكحلة تقريباً، وفيها بقع برتقالية وحمراء كتشبه عيون كتضوي، وفوقها كاينين ثلاثة ديال الزوائد الطويلة اللي كيعطيوها شكل كيذكّر بالقرون.

ولكن الغريب فيها ماشي غير الشكل ديالها. هاد النبتة كتخرق واحد من أبسط القواعد المعروفة عند النباتات: ما كتحتاجش لضو الشمس باش تعيش.

حسب مجلة  ScienceAlert، الباحثين من جامعتي شولالونغكورن وأمير سونغكلا فتايلاند، واللي نشرو تفاصيل الاكتشاف فمجلة PhytoKeys، لقاو أن النبتة ما فيهاش أصلاً الكلوروفيل، وهي المادة الخضراء اللي كتخلي النباتات تدير التركيب الضوئي وتحول ضو الشمس لغذاء.

عوض ما تعتمد على الشمس، «زهرة الشيطان» طورات طريقة أخرى باش تعيش. كتدخل فواحد النظام البيولوجي كيسمى التغذية الفطرية غير الذاتية  (Mycoheterotrophy).

هاد النبتة كدوز حياتها مخبية تحت طبقة ديال الأوراق اللي طايحة، وكتكون عندها جذور باهتة بحال الشعاب المرجانية. هاد الجذور كتكون مرتبطة بالفطريات اللي كاينة تحت الأرض، لي كتقدر تاخد الكربون والمغذيات اللي محتاجاها.

وفالغالب، ما كتطلعش فوق الأرض إلا لمدة قصيرة، غير باش تزهر وتنتج الثمار قبل ما ترجع تختافي وسط الأوراق.

العلماء لقاوها فـماي 2025 وسط متنزه ثونغ فا فوم الوطني فغرب تايلاند، وعلى علو كيقرب ألف متر فوق سطح البحر. والاكتشاف كان مفاجأة، حيث هاد النوع قدر يتأقلم مع بيئة جبلية، عكس بزاف من الأنواع القريبة ليه من جنس Thismia، اللي كتعيش عادة فالغابات المطيرة المنخفضة والرطبة بزاف.

التحاليل الجينية اللي داروها الباحثين بينات أن هاد المجموعة النباتية منتشرة أكثر فالشمال، وأن عدد الأنواع المسجلة فتايلاند وصل دابا لـ16 نوع.

ولكن الفرحة بالاكتشاف ما دامتش بزاف، حيث العلماء دقو ناقوس الخطر على مستقبل «زهرة الشيطان».

لحد الآن، تسجلات غير مجموعة وحدة من هاد النبتة، وما فيهاش أكثر من 50 نبتة، وموجودة فمساحة صغيرة بزاف ما كتفوتش 0.05 كيلومتر مربع.

والمشكل أن هاد المنطقة، وخا أنها وسط محمية طبيعية، كتستقبل السياح. مرور الناس فوق الأرض يقدر يسحق الزهور النادرة، والأخطر أنه يقدر يخرب شبكة الفطريات الهشة اللي كتعتامد عليها النبتة باش تعيش.