كود هناء ابو علي ///

البارح الحكومة علنات على فتح المجال الجوي المغربي ف7 فبراير المقبل. يعني اللي بغى يدخل للبلاد يدخل ولارام غادية ترجع لرحلاتها العادية بعد قرار غبي دام كثر من 3 اشهر بسباب متحور ماشي خطير اسمو “اوميكرون”.

دابا الحكومة دارت بيان. مزيان انها واخيرا عطات تاريخ. غير هاد التاريخ راه بعيد. 12 يوم راها بزاف. فاغلاق الحدود عطات 48 ساعة وفاعادة فتح المجال الجوي والحدود البحرية والبرية عطات 12 يوم.

دابا البيان كيهدر على الرحلات العادية من والى المغرب. لكن الحكومة عندها قرار اخر بيدها باش تصلح الجرة. باش تخلي لمغاربة اللي حصلو برا يدخلو بلادهم. باش تخلي مغاربة العالم اللي عندهم شي جنازة او اي حاجة شخصية او مهنية مزروبة يجيبو يقضيوها.

هاد الشي كيسمح كذلك باش لمغاربة يمشيو للكاميرون يتفرجو فالاسود فماتش نصف النهاية فحالة ايلى ربحنا المصريين نهار الاحد الجاي فربع النهاية.

المصريين دايرين رحلات استثنائية من نهار بدا الكان. كيديرو الجمهور وكيرجعوه فنفس النهار. ممكن لمغاربة يديروها. يمشيو يتفرجو ويرجعو فنفس النهار. دابا تنظيم رحلات لماتش الاحد فالربع تقريبا مستحيل. ما بقى والو. خاص غير ندوزو للنصف ونشوفو.

ولكن الاهم خاص الدولة تساهم فانقاد لارام برحلات قبل. دور الحركة وتفرح لمغاربة اللي حاصلين فاسبانيا ففرانسا فايطاليا فبلجيكا فكاع دول اوربا اولا ثم رحلات استثنائية من دول اخرى فالقارات الاخرى.

لا يعقل ان يتم حتى 3 رحلات فدجيت بريفي من مالقا لكازا لمواطنين ما لقاو حتى حد من غير هاد الشي. لا يعقل ان بوريطة يبقى يعطي تصاريح لهاد الرحلات اللي قلبوها بيع وشرا ومن حقهم٬ ولارام كتموت. خاص هاد القضية ديال الرحلات بدجيت بريفي تسالي. اللي بغى ياخدها بوحدو من حقو ولكن باش تولي بحال طاكسي كدير كورسا وبوريطة يدعم هاد الشركات يترفحو ويضر بالقدرة الشرائية لمواطنين ويخلي طيارات لارام كيشومر فهادا عبث ما بعدو عبث.