محمد سقراط-كود///

ودابا فاش ولات مرأة رئيسة حكومة، على الاقل خاص تولي تورث بحال  خوها فرزق باها، وتشهد على الوثائق بحال الرجال، وتمارس الحب فين بغات ومعامن بغات بلا متحتاج رخصة من الدولة على شكل كاغيط الصداق، والى نعس معاها راجلها وهي ماباغياش يتسمى اغتصاب زوجي، والى طلقات وكانت كتخلص كثر من راجلها تعطيه النفقة، وتولي محمية في الفضاء العام وفي الانترنيت من العنف والذكورية السامة، ويولي عندها الحق تورث في رزق باها بلا مايقسم معاهم عمها غير حيت معندهاش خوها ذكر.

إييه  أول مرة في تاريخ المغرب كتولي فيها مرأة رئيسة حكومة، ولكن في نفس الوقت بحال الى مشينا بالمقلوب بدينا من الفوق عوض القاعدة، ومن بعد رحلة طويلة  وصلات مغربية لرئاسة الحكومة، في نفس الوقت الأمية بين العيالات في المغرب وحتى العيالات الحاملات للشواهد العليا كتبقى قل من دول بحال تونس والأردن كمثال، منمشيوش لاوروبا نتقارنوا غير مع دول إسلامية بحالنا، راه لحد الآن تولي مرأة رئاسة الحكومة خاص تكون غير بداية رحلة نضالية حقوقية لتمكين المرأة كثر في المغرب.

رحلة تمكين المرأة كتبدى من إعطائها حقها الكامل في رزق باها، وتوفير تعليم بمستوى عالي وحماية في الفضاء العام، والباقي هي غادي تزطط فيه من راسها دغية، راه المغربيات مهاجرات في العالم كامل واغلبهن ناجحات فاش كيلقاو مناخ ديال الحرية والحقوق ومحميين بالقانون كيبدعوا وينجحوا ويمشيو بعيد، بينما مشاركتهم الاقتصادية في المغرب قليلة بزاف مافايتاش عشرين في المية، هادو راه ارقام ديال دول متخلفة كتقمع المرأة وتلغيها من الفضاء العام، وهادشي ماجايش مع هاد الصورة ديال بلاد كتقودها مرأة قوية، راه هادي بالظبط ديال مغرب السرعتين، بنات الأعيان والأرستقراطية يقدرو يوليو رئيسات حكومة، بينما بنات الدوار والعروبيات والاحياء العامشية باقين كيتزوجوا قاصرات بلا قراية بلا شهادة، وباقي حقهم في الورث ناقص بالنص، وباقي بزاف ديال المشاكل نتمناو من هاد الحكومة التي تقودها امرأة أن تضع حدا لها.ح