كود طنجة ////

توصلت “كود” بمعطيات جديدة في ملف صعصع د القصر الصغير، اللي داير فيها سبيرا وكيتعدى على المواطنين والسياح وحتى حد ما كيهضر معه رغم الشكايات التي كتوضع ضدو.

المدعو ر. بولعيش باقي كيتبورد فحالا ما داير والو، ورغم أوامر وكيل الملك باستدعاء المعني بالأمر وتعميق البحث في الملف ديالو اللي عامر مشاكل.. آش منك يا بلطجة واعتداءات وحروب وصلات لاستعمال الرصاص، السيد مازال ما مشى عند البوليس ولم يتم إلقاء القبض عليه، أكثر من ذلك علمت “كود” بأن وكيل الملك رغم التعليمات الصارمة ديالو وإلحاحه على تطبيق القانون فهاذ الملف توصل بمراسلة غريبة فيها باللي”تعذر الاستماع إلى المعني بالأمر”.

مصادر تحدثت إليها “كود” قالت باللي “الفوحان” للي كان هاذ رضوان بولعيش كيفوح به على الضحايا ديالو بللي ما عندهم ما يصورو منو ولى كيبان صحيح، وهاذشي كيخلينا نطرحو سؤال: “شكون كيحمي هاذ خونا، وعلاش تعليمات النيابة العامة باقا ما تنفذاتش حتى لدابا؟!”.

هاذشي للي واقع فهاذ الملف خلى مصادر “كود” بالقصر الصغير كطالب بتوسيع البحث باش يشمل حتى الممتلكات للي عند هاذ بولعيش ولي هي عبارة عن أراضي ومنازل وسيارات منين جاتو وواش عندها علاقة بتبييض الأموال، وهاذشي راه كان مفروض يتجبد معه من النهار الأول للي تم الاستماع فيه له، حيث كان صرح للبوليس بأنه ما خدام ما والو ومن عائلة فقيرة وعندو علاقات بمافيا الاتجار في المخدرات وثمن سنين حبس فالصبليون. لكن هاذشي ما دارش وخونا خرج كيف ما دخل.

وكانت “كود” سباقة إلى نشر خبر اعتداءات هاذ البلطجي المدعو ر. بولعيش والملقب بـ”بوكليطة”، وبأنه عندو ضوسي كحل فيه الابتزاز وتجارة المخدرات والتهديد بالتصفية بالرصاص، وهاذشي نيت لي كتقول تعليمات النيابة العامة اللي أمرت بـ”تعميق البحث مع المعني بالأمر حول المنسوب إليه، وإجراء بحث شامل حول المعني بالأمر ومصادر دخله وصلته بالمخدرات وإغلاق الحدود في وجهه وسحب جواز سفره وإعادة تقديمه، كل ذلك في أجل لا يتعدى خمسة عشر يوما”، لكن خونا لي كان عام ونص وهو هربان، وموضوع مذكرة بحث خرج كيف دخل، بلا ما يتم اعتقاله.. والبحث لي حددت النيابة العامة له 15 يوم كأقصى أجل دازت عليه دبا ستة أشهر ومازال كيتسارى يتعدى على المواطنين.

المشكل هنا، تقول مصادر “كود”، هو كيفاش هاذ خونا مني كان موضوع مذكرة بحث لم تتم مراسلة الشرطة الدولية (الانتربول) بخصوص السوابق الموجهة له، بل حتى تصريحاته أمام الشرطة القضائية ما فيهاش هاذ الكوارث، وخونا دخل كيفما خرج.

أكثر من ذلك خونا كان خرج لاسبانيا بالباسبور. كيفاش دار لها الله أعلم… لكن هاذشي ما طرحش عليه مللي كانو كيستمعو له.

دبا وكيل الملك عطا الأوامر ديالو لي كانت واضحة. خاصو يسهر على تطبيقها.