كود – عثمان الشرقي //

لبارح الخميس واحد العون من المكتب المغربي لحقوق المؤلف والحقوق المجاورة (BMDA) دخل لقهوة فمدينة تازة باش يدير معاينة روتينية الهدف منها التأكد من احترام مقتضيات القانون المغربي المتعلق بحقوق المؤلف.

مول القهوة كان كيخدم كيف العادة أغاني الفنانة فيروز لكليان فالصباح، غير هو هاد المرة تفاجأ بالعون لي حرّر ليه محضر مخالفـة بدعوى “استغلال مصنفات محمية بدون ترخيص”، وفق القانونين 2.00 و 34.05 اللي كيلزم أي فضاء مفتوح للعموم يخلص رسوم سنوية مقابل استعمال الموسيقى أو أي محتوى فني محمي.

قضية بحال هادي ماشي جديدة، فالسّنوات الأخيرة توصلات مجموعة من القهاوي والمطاعم فالمغرب بإشعارات وغرامات مماثلة، كتراوح غالباً بين 3000 و7000 درهم فالعام، رئيس الجمعية الوطنية لأرباب المقاهي، نور الدين الحراق، كان سبق واعتبر بعض الإشعارات “تعسفية”، وكيأكد أن أرباب  المهنة اقترحو أداء مبلغ رمزي 200 درهم سنوياً دعماً للفنانين، لكن المكتب رفض هاد المقترح.

مول القهوة فالاخير كيعلق بعد ما جاه البروصي اليوم الجمعة بكل سخرية : ”بعد الضبط بالجرم المشهود لي هو الاستماع على أغنية فيروز على المنصة العالمية اليوتيب المجانية و التي يشاهدها الملايير و ليس الملايين المغاربة فقط قررت اللجنة بيه فيه بتغريمنا بمبلغ 4840 درهم وخا تجي فيروز شخصيا تغني و الله لا خدتها“

هاد القضية كتفتح من جديد النقاش على كيفية تطبيق القانون، وعلى التوازن بين حماية حقوق الفنانين وبين الواقع الاقتصادي للمقاهي والمطاعم فالمغرب.