كود وجدة//

محكمة الاستئناف ديال وجدة، صدرات أخيرا، أحكام غليضة فحق 17 متهم، فيهم خمسة ديال المتهمين من عائلة وحدة، تابعتهم النيابة العامة بتنظيم شبكة خطيرة كتستعمل “الدرون” فتهريب المخدرات عبر الحدود الشرقية.

هاد الملف خضا 6 جلسات، جوج منهم تأجلو بطلب من دفاع المتهمين، وعرف نقاش قانوني قوي حيت القضية كتهم وسائل حديثة فارتكاب الجرائم، واعتبرها البعض سابقة فالمحاكم المغربية بسبب تعقيدات توصيف الجرائم المرتبطة بالـ”درون”.

الفرقة الوطنية للشرطة القضائية من كازا كانت سباقة فتعقب هاد الشبكة اللي كينتمي أفرادها لوجدة وبني درار وبني خالد، وقدرت ترصد تحركاتهم قرب الحدود الشرقية، خصوصا فدوار أولاد صالح وأولاد حمو.
التحقيقات ديال البوليس سالات بتوقيف أفراد الشبكة على مراحل، وكشفات أنهم كيستعملو الطائرات المسيرة باش يتفادو المراقبة التقليدية، الأمر اللي خلا الأجهزة ديال البوليس تعزز آليات الرصد لمحاربة هاد النوع الجديد من التهريب.
مصادر (كود) أكدات أن المتهمين، امان متابعتهم بجنح وجنايات من بينها:
الحيازة والاتجار الدولي فالمخدرات
التهريب خارج مكاتب الجمارك
استيراد طائرات مسيّرة بدون رخصة
التحليق فوق مناطق محظورة
استعمال الدرون لنقل مواد محظورة
تشغيل طائرة بلا ربان فوق التراب الوطني بدون إذن
استغلال خدمة للنقل الجوي بدون ترخيص
الإرشاء

أما الأحكام فكانت
10 سنوات نافذة: في حق 8 متهمين
8 سنوات نافذة: في حق 4 متهمين
بين 5 و2 سنوات: لعدد من المتهمين الآخرين
4 أشهر نافذة: لمورد الطائرات المسيرة

المحكمة قررت كذلك مصادرة 4 سيارات ودراجة نارية وهواتف بعض المتهمين والطائرات المسيرة المحجوزة لفائدة إدارة الجمارك.