كود هناء ابو علي ///

سعيد الناصري مخرج ومنتج وبطل فيلم “نايضة” كذب على لمغاربة. كيفاش؟ باش خلى فالايام اللولى الانطباع عند لمغاربة باللي فيلمو ممنوع من القاعات السينمائية ومن الدعم ومن ومن. خلى صفحات كثيرة كتسوق باللي كاين استهداف ليه بسباب فيلم دارو على الحكومة. على الوزرا. اعتابروه شجاع وووو. الناصري دارها استراتيجية. بقى ساكت باش يشوفو فيلمو اكثر فاليوتوب.

دابا حتى وصل لشي 18 مليون مشاهدة عاد خرج كيقول باللي هاد الفيلم ما ممنوعش وباللي خدا رخص التصوير من المركز السينمائي المغربي. دابا عاد خرج كيقول باللي اي واحد قال باللي راه ممنوع من الاستغلال فالقاعات السينمائية غادي يدعيه. طبعا حتى هادي كذبة اخرى.

الناصري خلي كلشي يفهم باللي ممنوع ومحارب وهو عارف هاد الشي كذوب. دابا وفق وثائق رسمية للمركز السينمائي المغربي ففيلمو “نايضة” تعرض فالقاعات السينمائية بالمغرب ف2023. وفق هاد الوثائق فالفيلم كان هو الثالث فالبوكس اوفيس المغربي ل2023 ودار 85 الف و353 اونتري. اي شافو هاد العدد من لمغاربة ودخل لجيبو 4 مليون و526 الف درهم اي 450 مليون سنتيم.

حسب حصيلة 2023 للمركز السينمائي المغربي ففيلم “دادوس” لعبد الواحد مجاهد كان هو اللي خدا راس السوق فالبوكس اوفيس. شافوه 164 الف مغربي وجاب 8 مليون و700 الف درهم. تبعو فيلم “هما للي بقاو: جوج” للمخرج ربيع شجيد.

دابا كلشي اللي روجو الناصري عن طريق صفحات وو كان كذوب ومحاولة اظهارو مظلوم كيحاربو النظام.

دار ندوة صحافية وبدا يخرج اعلاميا حتى هادوك اللي ضد المغرب بداو يوظفوه. هو اللي قلب علي هاد الشي. استحلاها. اليوم باش شاف القضية بدات تاخد ابعاد اخرى خرج كيعطي تبريرات غبية. كان يتحلى بالشجاعة ويبقى على نفس الخط اللي خطو النهار الاول ماشي اليوم يقول راه مع البوليس ومع الحكومة وكيهدر غير علي التواصل.

بغظ النظر علي ضعف العمل على اكثر من مستوى وغياب الابداع فيه٬ باش شي حد كيسمي راسو فنان كيخرج يشرح اش كيقصد بالقصة وبالعمل٬ عرفوه عمل ناقصو الفن والابداع. الابداع ما محتاجش مخرج يدافع عليه.