كود – سبور //

دايرة هاد الأيام فمواقع التواصل الاجتماعي   تصويرة ديال وثيقة مكتوبة بالفرنسية، بعنوان  “ملحق سري لاتفاقيات إيكس ليبان”  دارت عام 1955 بين المغرب وفرنسا.

قراية خفيفة لهاد الورقة والتحليل ديالها كيبين باللي الوتيقة غير مخدومة وأكبر دليل  هو البند الثالث لي مكتوب فيه باللي: يلا تلاقى المنتخب المغربي مع الفرنسي فكأس العالم، المغرب ملزم يخسر بخاطرو وفرنسا ما تماركيش كثر من جوج !

الوتيقة كتبين باين باللي كتب هاد المعاهدة مايكون شي حد عجباتو الإشاعة لي دايرة ودارها طنز، وغالباً هاد التصويرة بانت مورا الماتشات الكبيرة لي لعبها المغرب ضد فرنسا فكأس العالم الأخيرة.

من غير النكتة ديال كورة، هاد الورقة ما فيها حتى ريحة ديال الحقيقة التاريخية ،أولاً، مسيني فيها واحد سميتو “H. Du Bois” بصفة “الوزير المفوض الفرنسي”، وهاد الاسم ما كاينش كاع فالأرشيف الرسمي (الناس لي سينيوا بصح هما رئيس الحكومة إدغار فور والوزراء ديالو). ثانياً، ديك لافورم ديال الورق القديم المحروق من الجناب والطبعة المزورة كولشي مصاوب بالذكاء الاصطناعي.

فالحقيقة، مفاوضات “إيكس ليبان” (غشت 1955) كانت محطة تاريخية بزاف فمسار استقلال المغرب ،تلاقات فيها الحركة الوطنية المغربية مع المسؤولين الفرنسيين باش يلقاو حل للأزمة السياسية لي ناضت، ملي فرنسا نـفات السلطان وهاد المفاوضات الرسمية جابت الرجوع ديال محمد الخامس من المنفى، وتشكلات أول حكومة مغربية، وهادشي هو لي حل الباب نيشان باش المغرب يعلن الاستقلال ديالو فـ 1956، بعيد كول البعد على الكورة والمونديال .