الرئيسية > كود سبور > وا فيلم مع دجوكوڤيتش.. عاوتاني السلطات الأسترالية لغات الڤيزا ديالو والمحكمة غادي تحسم فقرار ترحيلو هاد الليلة – فيديوهات
15/01/2022 13:00 كود سبور

وا فيلم مع دجوكوڤيتش.. عاوتاني السلطات الأسترالية لغات الڤيزا ديالو والمحكمة غادي تحسم فقرار ترحيلو هاد الليلة – فيديوهات

وا فيلم مع دجوكوڤيتش.. عاوتاني السلطات الأسترالية لغات الڤيزا ديالو والمحكمة غادي تحسم فقرار ترحيلو هاد الليلة – فيديوهات

كود سبور – وكالات //

عاوتاني، تم احتجاز نجم التنس الصربي نوڤاك دجوكوڤيتش فأستراليا قبل جلسة استماع فالمحكمة، اللي من المنتظر تقرر واش غادي يبقى فالبلاد بدون تلقيح ضد فيروس كورونا، بعدما وصل هادي سيمانة تقريبا باش يشارك فبطولة أستراليا المفتوحة للتنس.

وكيواجه دجوكوڤيتش (34 عام)، المصنف اللول عالميا، احتمال الترحيل بعدما تلغات الڤيزا ديالو للمرة الثانية دبا، وقالت المحكمة بللي نوڤاك كيشكل “تهديد وخطر” على الناس.

والمحامين ديال اللعاب الصربي استانفو الحكم اللي وصفوه بـ”غير العقلاني”، ومن المقرر تدار جلسة استماع اليوم السبت بالليل.

ومع ذلك لحد الساعة مزال “منتظر” يلعب دجوكوڤيتش فبطولة أستراليا اللي غاتبدا الإثنين الجاي فملبورن، حسب تقارير إعلامية.

لكن جلسة الأحد، اللي غاتبدا فـ22:30 (السبت بالليل) بتوقيت كَرينتش (09:30 ديال الصباح بتوقيت أستراليا)، هي اللي غاتحسم كلشي وتقدر تسالي هاد “الفيلم” اللي طول، وديك الساعة غايبان واش دجوكوڤيتش يقدر يشارك ويبدا مسيرة الدفاع على اللقب ديالو الغد ليه أو لا.

إيلا خسر الاستئناف، وهذا حتى هو احتمال كبير، غادي يصيفطوه فحالو ويرحلوه من أستراليا ويتمنع من دخولها لمدة 3 سنين.

وكانت السلطات الأسترالية لغات الڤيزا ديال دجوكوڤيتش لأول مرة مباشرة فاش وصل لمطار ملبورن نهار 6 يناير 2022، وقالو مسؤولين من مصالح شرطة الحدود فأستراليا بللي اللعاب الصربي “ماعطا حتى دليل مناسب ومقنع” اللي كيبرر الإعفاء ديالو من شرط التلقيح ضد “كوفيد-19”.

وبقا دجوكوڤيتش حاصل ومشدود لأيام فأوطيل تابع لإدارة الهجرة. من بعدها وبفضل طعن فهاد القرار، قدموه المحامين ديالو، عاود قاضي أسترالي ڤاليدا ليه الڤيزا وعطا أوامر باش “يتطلق سراحو”، هادشي كلو بمبرر أن مصالح شرطة الحدود ما طبقوش الإجراءات الصحيحة عند وصول اللعاب لمطار ملبورن.

ومن جديد، وفالعشية ديال البارح (الجمعة) فمدينة ملبون، لغا وزير الهجرة الأسترالي، أليكس هاوك (Alex Hawke)، الڤيزا ديال نوڤاك بناء على قانون الهجرة فأستراليا.

وكيسمح القانون للوزير بترحيل أي شخص كيعتابرو خطر محتمل على “صحة المجتمع الأسترالي أو سلامتو أو نظامو “.

هاد لافير دايرة حالة فأستراليا خصوصا وفالعالم كلو وتسببات فنقاش كبير حتى خارج المجال الرياضي، على كيفاش نوڤاك دجوكوڤيتش كيقلب على تعامل استثنائي من دون الناس، باش يتعفا من قيود و إجراءات احترازية ضد انتشار فيروس كورونا اللي مفروضة على الأستراليين وكَاع الناس اللي كيسافرو لأستراليا؟.. باغي تعامل فيه الكثير من التمييز فقط لأنه بطل مشهور.

وهادشي كعا بزاف ديال الناس، خصوصا الأستراليين اللي شافو بللي نوڤاك احتاقر قوانين بلادهم وقلل من الاحترام لكثير من الناس اللي كيعانيو  مع هاد الوباء، وكيحاول يتحايل على القانون بشكل أناني باش غير يشارك فبطولة أستراليا المفتوحة اللي فايت رابحها 9 دالمرات، وكيطالبوه فقط يمشي فحالو ويبدل الساعة بأخرى، احتراما لتاريخو مع هاد البطولة.

فكل الأحوال القضاء الأسترالي غادي يقرر فهاد القضية اليوم بالليل، وغانشوفو واش هاد “السيري” غادي تسالي أخيرا أو مزال مطولة.

موضوعات أخرى