وكالات//

فواحد الحادثة غير عادية وكتقرب لمشاهد الأفلام، قدر راجل كندي يسترجع خواتم الزواج ديال مرتو بعدما تلوحات بالغلط فالزبلة العضوية، وهادي نهاية البحث الغير عادي ديالو فمكب النفايات فبريتيش كولومبيا واللي توصف بـ”المعجزة”.

القصة بدات ملي كان ستيف فان ييسيلدايك ومرتو جينين، اللي مرتبطين من 26 عام، كيتفرجو وكياكلو الفشار اللي جابوه من السينما. وفاش كانو كيفرغو الكيس فالجنينة ديال الدار، طاحو خواتم جينين المرصعة بالالماس فالكيس اللي من بعد مشى فالسلّة ديال السماد. وما لقاو الزوجين الخواتم ضايعين غير من بعدما تجمعت الزبالة وتنقلت بالفعل للمكب.

وبالرغم من صعوبة المهمة، قرر ستيف يمشي لمكب “ميشن” للنفايات، وكان خاصو يقلب وسط 18 طن ديال المخلفات فنهار ماطر اللي ساعد شوية باش الريحة ما تكونش قوية. وقال ستيف وهو كيبسم: “كنت عارف خاصني نلقاهم، حيث الزوجة خصها تحتافظ بخواتمها”.

وجات المفاجأة ملي ستيف تعرف على بقايا النقانق اللي عائلتو تخلصات منها قبل، وهادي دلّاتو على البلاصة الصحيحة. وبعد أقل من ساعة، لقا أول خاتم ومن بعد الثاني، فمشهد خلا الناس كاملين اللي شافوه مبهورين.

فديك اللحظة، جينين كانت كتشري جهاز كشف المعادن باش تعاون فالبحث، قبل ما توصلها مكالمة من راجلها كايخبرها باللي لقا الخواتم، وفاضت ليها الدموع. وأكد ستيف أن هاد التجربة زادت القوة ديال الربط بيناتهم، وقال: “الناس ممكن يندهشو من اللي وقع، وأنا بحالهم مندهش، ولكن الإنسان كيدير المستحيل ملي كيهمو اللي كايحب”.

++