كود هناء ابو علي ///

سيدنا فكازا. بيضاوا فرحانين. فرصة باش هاد لمدينة تقاد شوية. مظاهر التهرگاويت كتختفي شوية. هادوك اللي كيعتاقدو ما يقدر عليهم حد كيهربو. بزافت بيضاوا كيتمناو غير تطبيق القانون. لا شيء غير القانون.

سيدنا كيعجبو يدير ديورة فعين الدياب. نتمناو يوقف قدام ديك الفوضى اللي دايراها اسماء الجهيري “حاكمة عين الدياب”. هاد الشي كاين ف”لاريزيفت” الشهيرة.

عند هاد سيدة الاعمال جوجت مطاعم “تشيلو” و”لاڤيراندا” كارياهم من الاملاك المخزنية. غير هو نهار 13 يونيو 2025 دارت الدائرة الحضرية الثانية بانفا” وبالضبط الملحقة الادارية الساحل 14 التابعة لعمالة مقاطعات انفا “محضر معاينة مخالفة” لحاكمة عين الدياب اسماء الجهيري بنت ابن سليمان. ودار رئيس الملحقة الادارية الباشا فؤاد الكرتي رسالة الى لالة اسماء كيأمرها بانهاء مخالفات التعمير والبناء وشدد على ان محل المخالفة هي “مقهى ومطعم “ڤيراندا” رقم 50 بشارع لاكونيش عين الدياب انفا البيضاء
فهاد الوثيقة الرسمية آمر هاد الباشا لالة اسما حاكمة عين الدياب ب”اتخاذ كافة التدابير لانهاء المخالفة فهاديك الريسطو وهي “وجود مطعم مقهى بالتيراس “مكتمل البناء والمطل على شارع لاكونيش والمسمى: تشيللو وذلك بجزء من الرسم العقاري عدد 9421 س =ج= والتابع للاملاك المخزنية والمتواجد بمنطقة ذات الرمز RC محرمة البناء حسب تصميم تهيئة مقاطعة انفا

واضاف الباشا باللي كاينة قهوى مطعم مجهز بالطابق التحت الارضي الثاني اسمو “لاڤيراندا” والتابع للملك البحري العام” وباللي كاينة مساحة خضراء بالطابق التحت ارضي الثاني تابع لهاد المطعم: لاڤيراندا” وباللي كاين دروج بالواجهة الرئيسية مؤدي الى الطابق التحت الارضي الثاني

وعطاو لهاد السيدة اسما الجهيري 20 يوم من تاريخ توصلها بهاد القرار باش تريب وباللي فحالة عدم الامتثال غاديين ياخدو فحقها “كافة التدابير الزجرية” كيف كاينين فالقانون
ونهار 17 من يونيو مشى عندها مفوض قضائي وسلمها الانذار ووقعات عليه. اي خاصها نهار 7 يوليوز تكون نفذات كلشي. دابا حنا ف17 شتنبر اي شهرين و10 ايام وحتى حد ما قرب منها، اه نسيت كانت محاولة حشومية بزاف نهار خرج فيديو “شوف تيفي” على هاد لفضيحة.

دابا هادا راه القرار الثالث اللي تخاد. كان تخاد قرار فابريل 2016 واللي كنا نشرناه ف”كود” وجا قرار اخر فيونيو 2018 دارتو الوكالة الحضرية لكازا وهدرو على مخالفات تعميرية ووالو

دابا راه هاد الشي ماشي غير احتقار للسلطات ولتطبيق القانون بل كتشكل خطر وثمنو يقدر يكون كبير بزاف. فين عمركم شفتو ريسطو او بواط كاينة فالطابق الارضي الثاني اي سو سو سول. وا السلطات مشيتو سديتو مطعم على التهوية البارح وهادي كاين قرار وحياة عدد من بيضاوا مهددة وما قدرتوش عليها.

دابا بيضاوا معولين على سيدنا لتطبيق القانون. باغيين نساليو من هادوك الحقرا اللي كيداعيو حمايتها.