كود عن أ ف ب ///

بهاد السلوك اللي كنشوفوه فالمغرب٬ احتمال كبير ترتافع الاصابات عندنا واخا وصلنا لشي 20 مليون مغربي دار الڤاكسان منهم اكثر من 9 مليون دارو الجلبة الاولى والثانية.

فالسواق فالزناقي فالريسطورات فالشارع فالمرافق العمومية٬ الناس ما بقاوش دايرين الماسك تقريبا. تراخي كبير وصافي. ولكن خاص لمغاربة يعرفو باللي هاد الڤاريان المسمى “دلطا” من كورونا٬ راه غادي وينتاشر وبسرعة. ففرانسا مثلا راه كيمثل 20 بالمائة من مجموع الاصابات دابا.

بلا ما نمشيو بعيد نشوفو غير تونس. راها كتعيش كيف قال البروفيسور أمان الله المسعودي اللجنة العلمية التونسية ‘تسونامي’ كوفيد-19
واوضح ان المعدل الوطني للعدوى تضاعف ووصل 203 حالات لكل 100 ألف نسمة.

عضو اللجنة العلمية قال باللي هاد الشي اللي كتعيشو بلادو كيهدد الامن القومي والصحي لتونس وطلب بمنع كاع التجمعات ودار بزاف الڤاكسان

عندو علاش يخاف. راه وزارة الصحة ديالهم قالت باللي نسبة الضغط على أسرة الأكسجين فاقت 73% وعلى أسرة الإنعاش 89 % في المستشفيات الحكومية في كامل البلاد، فيما بلغ معدل الوفيات اليومي خلال الأسبوع اللي فات 83 وفاة.

ولكن الوزارة ماقدراتش تسد تونس كلها ورجعات هاد الشي الى “صعوبة الوضع الاقتصادي والأمني والنفسي”.

تونس علنات على تشديد التدابير لمكافحة الوباء. ومددات ساعات حظر التجول الليلي فكاع لبلاد بلا ما يمشيو لحجر صحي تام.

الاقتصاد التونسي كلى لعصا. راه انكامش ب3 بالمائة خلال الفصل الأول من العام. مع 5.251 حالة فالنهار راها كتخلع.

حنا فالمغرب الوضعية متحكم فيها ولكن مع دخول اعداد كبيرة من مغاربة العالم كلشي ممكن. خاصنا نردو بالنا كثر. لكمايم. التباعد. وخاص التلقيج واخا مازال كاينة صعوبة تجيبو.