سهام البارودي ـ كود//
وشحال معقدين هاد المزاليط! وشحال فيهم ديال الفهامات والهضرة الخارية، غي ماكايلقاو مايقولو كايقوليك “كون كان راجل گاعما يبين مرتو” “ديوثي” وهاد الكومونطير كانشوفو بزاف عند صناع المحتوى المغاربة لي كايبانو مع عيالاتهم! وهادشي طبعا راه جاي من النظرة الدونية للمرا كشي حاجة كاتجيب “العار”، عورة، حشومة، خاصها ماتبانش، خاصها تبقى فالدار، خاص تاواحد مايعرفها وهاد الثقافة د البدو لي بلانا بيها الله.
الراجل لي راجل وماعندو حتى شك فرجولتو راه ماعندوش مشكل يبين مرتو وكايبان حداها بفخر، راه مراتو هاديك شريكة حياتو، أي إنسان سوي غايكون فرحان الناس يشوفو ويعرفو مراتو وطبعا أي إنسان معقد وعندو شك فرجولتو راه نورمال يخاف العالم يشوف ليه مرتو.
زوجات الملوك والرؤساء والوزراء وكانشوفوهم، زوجات المشاهير واللعابة د الكورة والمغنيين والممثلين وكايحضرو معاهم فالمناسبات وكايصوروهم الباباراتزي والصحافة… الناس لي عندهم الملايير وكايسيرو البلدان والشركات والمؤسسات الدولية، الرجال ديال بصح وكايبانو مع عيالاتهم بشكل طبيعي وعادي وبوسلهام البوقلالي قاليك لا هادوك ماشي رجال هوا بوحدو لي راجل !
هاد تارجليت حيت مفهوم هلامي، فضفاض ماعندوش شي مقياس وشي معيار محدد، غا لي تلفات ليه الحلوفة ولقى راسو ماكايسوى حتى بصلة فالمجتمع لا ماديا لا معنويا آش كايشيط ليه؟ كايشيط ليه هاد المفهوم ديال الرجولة يتكسى بيه من العرا لي كايعاني منّو.
