كود مصطفى الشاذلي كازا ///

نهار ماتش الراجا ضد بركان فنهائي كأس العرش السبت اللي فات فتيران مولاي عبد الله بالرباط صفرو شي وحدين كانو مع جمهور الراجا باش كان النشيد الوطني كيتعزف. تصرف خطير اه. والاخطر هو شي وحدين بغاو يركبو عليه.

دابا اليوم حكيم دومو رئيس النادي القنيطري اللي ما عرفناش اش من درجة كيلعب دابا بعد ما كان نادي كبير٬ كيشعل فالعافية. قاليك يا سيدي باسمو وباسم “المكتب المسير نندد بالسلوك الصغير اثناء عزف النشيد الوطني من طرف بعض الجماهير التي حضرت لقاء نهاية كأس العرش بين نهضة بركان والرجاء الرياضي”.

طبعا زاد تضامنو مع فوزي لقجع ضد الشعارات القدحية. هادي ماشي مشكلة.

غير هو قضية التصفار على النشيد الوطني اش داك ليها. كتصرف دابا بحال شي حد كيشعل العافية.

معالجة قضية التصفار على النشيد الوطني راها كبر من نندد بالسلوك الصغير. اولا ماشي سلوك صغير. راه تحول خطير جدا جدا. اللي غادي يخلص ماشي نادي او جمهور بل لبلاد.

واش هادو تصطاو٬ عوض ما يعالجو علاش وصلنا لهاد الدرجة كيعتاقدو ان الادانة حل.

الرجا نادي كبير وجمهورو كبير. الاستمرار فاستفزازو غادي يزيد يطرف. خاص حكيم فهاد لبلاد ياخد هاد الملف ويحلو. غير توقعو حتى واخا الراجا تهبط لكاطريام ديڤيزيون جمهورها غادي يكتار. الفرقة غادية تولي قضية وطن وديك الساعة يجي دومو يندد بالسلوك الصغير