أنس العمري-كود///

غذا جاية شتوا خطيرة فكازا. حسب التوقعات غادية توصل ل 50 ملم. علاش خطيرة. حقاش ما غادياش توقف. مقاطعة لمعاريف قالت فتدوينة على صفحتها باللي خاص بيضاوا يقللو من خيطي بيطي بلا فايدة. اللي ما عندو ما يدير يشد لارض.

من نصائح هاد الجماعة كذلك تبعد على لبلايص المحدورة وما تحطش طونوبيلتك فالباركينات تحت الارض ولا اللي حدا فين كاين لقوادس.

فنفس الموضوع الوكالة الوطنية للسلامة الطرقية نصحات صحاب الطونوبيلات يردو البال مزيان. طلبات منهم يوخرو تنقللاتهم حتى تحسن الظروف الجوية. دابا حسب الارصاد الجوية راه المستوى برتقالي. يعني خاص لمغاربة يردو البال مزيان. كاينة الشتا بزاف وكاين الرعد وكاين الثلج حتى هو غادي يطيح وكاينة الرياح قوية. هاد الشي كولو غيبدا من غدا لثلاث فعدد من المناطق

وكالة السلامة الطرقية قالت باللي على سائقي الكيران والكاويوات ديال السلعة يضاعفو الانتباه ويردو البال مزيان ويبقاو متبعين النشرات الجوية، خلال تنقلاتهم فمدن واقاليم المملكة

الوكالة هدرات على مضاعفة لكسايد مع سوء الاحوال الجوية وقالت باللي خاص مستعملي الطريق يتقيدو بشكل صارم بقانون السير واحترام قواعد وداك الشي ديال الوقاية والسلامة الطرقية. بحالاش؟
مثلا خاص الطونوبيلات والكاميوات والكيران…. يكونو ناضيين ميكانيكيا ويديرو الفحص التقني الدقيق لاجهزة السلامة ولبنوات ولفرانات وسويگلاص والضواو. واللي جاه النعاس يرتاح، تضيف الوكالة، ونبهات من الڤيتاس ….

ودعت لمغاربة باش يتفاعلو ايجابيا مع هاد النصايح