الرئيسية > featured > وا بنحمزة وا باراكا ماطلق فالسلوگيات على عباد الله، قاليك رونالدو ماتجوجش بجورجينا باش اذا تفارقو ماتاخدش ليه الثروة ديالو! راه واخا مامجوجينش اذا تفارقو حسب القانون الأوروبي جورجينا غاتاخد لرونالدو 350 مليون أورو! حيت فأوروبا كايشوفو المرا شريكة فبناء الثروة ديال الراجل ماشي خدّامة عندو نهار يتفارق معاها يلوحها للزنقة
03/03/2024 19:00 featured

وا بنحمزة وا باراكا ماطلق فالسلوگيات على عباد الله، قاليك رونالدو ماتجوجش بجورجينا باش اذا تفارقو ماتاخدش ليه الثروة ديالو! راه واخا مامجوجينش اذا تفارقو حسب القانون الأوروبي جورجينا غاتاخد لرونالدو 350 مليون أورو! حيت فأوروبا كايشوفو المرا شريكة فبناء الثروة ديال الراجل ماشي خدّامة عندو نهار يتفارق معاها يلوحها للزنقة

وا بنحمزة وا باراكا ماطلق فالسلوگيات على عباد الله، قاليك رونالدو ماتجوجش بجورجينا باش اذا تفارقو ماتاخدش ليه الثروة ديالو! راه واخا مامجوجينش اذا تفارقو حسب القانون الأوروبي جورجينا غاتاخد لرونالدو 350 مليون أورو! حيت فأوروبا كايشوفو المرا شريكة فبناء الثروة ديال الراجل ماشي خدّامة عندو نهار يتفارق معاها يلوحها للزنقة

سهام البارودي- كود//

شي لحايا الى ماطلقوش السلوگيات على بنادم ماكاتحلاش ليهم الجلسة، فحال بنحمزة لي خرج فواحد المداخلة كايقوليك آ سيدي بلي كريستيانو رونالدو لي الثروة ديالو تقدر بأكثر من مليار د الأورو حقا ما حقا مابغاش يتجوج بجورجينا حيت مّو قالت ليه ماتجوجش بيها و حقا ما حقا الى تجوجتي بيها غادي ليك فلوسك بقاو هاكا باش حتى لاتفارقتو ماتصور منك والو  ! و زاد من راسو شي هضرة من الريبيرطوار ديال القهاوي فحال مثلا المرا راه الى عرفات راسها عندها حق فالثروة ديالك غاتبغي تاخدو دغيا و ماغايولي عندها ربح تبقى معاك و شي بركة ديال الهرطقات !
طبعا هاد الهضرة لي قال بنحمزة راه نفس الهضرة لي قالوها شي مغاربة ديال حقا حكيمي كاتب كلشي لمّو و فاش تفارق مع هبة عبوق راه قولبها و مادّات منّو والو ! و نفس الناس لي كايعاودو هاد الهضرة فحال بنحمزة و الاشباه ديالو كاتلقاهم متيقين داكشي ديال المرا شبعها ففرجها و جوعها فكرشها و ربط تلقى ماتسيّب و النهار الاول كايموت المش و ضرب المرا بالمرا و الحوت و الحليب كايدير البرص !

الهضرة الخاوية ! التخربيق ! السلوگليات و شكون احسن من الخوانجية فطليق السلوگيات ؟! وا بنحمزة ! وا باراكا راه طلقتي عليها ضوبيرمان دابا ماشي سلوگية !  اذا جورجينا تفارقات مع رونالدو راه عندها الحق ف35% من الثروة ديالو يعني واحد البركة ديال 350 مليون اورو حلالا طيبا ! حيت فأوروبا المرا واخا تكون ربة بيت وواخا ماتكونش مجوجة بهاداك لي معاها عندها الحق فيه ! تعتبر شريكة في بناء الثروة ديالو ! وفرات ليه الظروف المعنوية و النفسية باش يدير الفلوس. هادشي طبعا ماغاديش يفهموه الخوانجية لي كايعتابرو المرا كائن من الدرجة الثانية مايمكنش يتساوى مع الراجل فماااابااالوكااا تاخد ليه فلوسو !
فالنگليز مثلا الى عشتي مع مرا اكثر من ست شهور كايولي عندها الحق فالثروة ديالك ايوا شنو باغي ضرب و تهرب آ سيموحمد ؟! راه بلاد القانون و المساواة هادي !

ياه شحال عزيز عليهم اذلال المرا ! ياه شحال عزيز عليهم يحگروها ! بنحمزة عاش سنوات فبلاد العيالات فيها كايعيشو حياتهم كاملة تحت السباط و ماعمرو مادوا عليهم، شحال من وحدة عاشت مع الراجل خمسين عام تصبن و طيب و يحوي فيها فابور و وفرات ليه الاستقرار المعنوي و الحب و الظروف فين يجلس هوا و يخمم و يخدم و ينتج و يدير الفلوس و فاللخر نهار كايتفارقو كاتخرج بجلابتها من الدار ماصورات تاخرية ! هادو بنحمزة ماكايشوفهمش كاتجيه عادية ! ايوا جورجينا على هاد الحساب خاصها تحمد الله و تشكرو حيت ماتزادتش و ماعاشتش فبلاد بنحمزة و عاشت فبلاد القانون لي ضامن ليها حقها !

موضوعات أخرى