علي الصافي – كود العيون //

كاين واحد الهدرة كثيرة على الصحرا وقضية حكم محكمة العدل الأوروبية الصادر نهار 4 أكتوبر 2024، بخصوص الاتفاقيات التجارية بين المغرب والإتحاد الأوروبي، وهاد القضية واحدة أبعاد كبيرة على مستوى البرلمان الاوروبي والإتحاد الأوروبي اللي عاكفين على دراسة هاد الحكم.

وفنفس الوقت كاينة حملة مبيرة من طرف البوليساريو والجزائر للترويج لهاد الحكم وربطو ايضا بالقضية الفلسطينية وقضية حكم المحكمة الصادر سنة 2019 والمتعلق بالمنتوجات اللي جاية من المستوطنات الإسرائيلية، وهاد الربط كيف كنعرفو من ورائه الجزائر اللي اعتامدات مقاربة جديدة فالنزاع تستغل فيها الوضع والحرب فغزة باش تروج لنزاع الصحرا وتكسب التعاطف.

من نهار صدر حكم محكمة العدل الأوروبية شفنا موقف محتشم بزاف لخصو بوريطة فان هاد الحكم مشكلة ديال الإتحاد الأوروبي، والمغرب ماشاركش فهاد المعركة القانونية وما سوقوش فيه، وفنفس الوقت استعمل وزير الشؤون الخارجية والتعاون الأفريقي والمغاربة المقيمين في الخارج واحد المقاربة فجة فالتعاطي مع خطورة هاد القرار، وهي أنه يتخبى خلف تصريحات الاتحاد الاوروبي ويردد وراهم أنشودة “الشراكة الإستراتيجية ذات القيمة العالية” وكذلك “العلاقات القوية والمتينة” و”التعاون الثنائي”.

هاد التخبية اللي مخبي ناصر بوريطة خلات المغاربة كلهم غائبين على آشنو واقع وآشنو غادي يوقع من بعد، وهادشي كيخلي ناصر بوريطة أمام مسؤولية اخلاقية كبيرة، وهي أنه يشرح للمغاربة قضية هاد الحكم ويخرج يواجه هاد الحملة الإعلامية اللي تقودها الجزائر ضدنا. على الأقل يخرج ويشرح للمغاربة ويخرج يهدر مع المستثمرين ورجال الاعمال فالصحرا حول هاد الحكم وعواقبه وشنو هو موقفنا منو، خاصة وان كلشي كيسول وباغي يعرف مصيره ومصير المنطق ومصير هاديك العوائد التي تستثمر في الصحرا وواش غادي يؤثر عليها هاد الحكم.

معاليهم ناصر بوريطة فكل فرصة وآخرها لقائه مع أوليفر فارهيلي، المفوض الأوروبي للتوسع وسياسة الجوار الأوروبي، كيحور الموضوع ويعطيه صبغة ديال الشراكة الإستراتيجية بين المغرب والإتحاد وديك الهدرة ديال حنا والاتحاد الأوروبي والروابط بيناتنا بحال الى هو اللي جاب اتفاقية الشراكة مع الأوروبين.

وا معاليهم بوريطة الشراكة بين المغرب والاتحاد الاوروبي راه موقعة سنة 1996 ودخلات حيز التنفيذ فسنة 2000 قبل ما تفكر انت دخل الخارجية وتبدا تكره فالعيالات وتحاول تسيطر عليها وتزرع الشك فالأطر ديالها اللي باغيهم يكونو مريدين وشيعة ديالك.

وا السيهوم بوريطة خرج هدر مع المغاربة وقولينا آثار هاد الحكم وشنو غاديين يديرو الناس المعنية، وباراكة ما تعاود لينا قضية الوحدة الترابية للمملكة راه سيدنا اللي مكلف بيها واللي كيقود دينامية دبلوماسية لترسيخ الوحدة الترابية للمملكة وانت كتجي تصور من بعد.