كود هند لكلاوي مراكش ///

البارح الاحد 17 شتنبر فجامع لفنا بمراكش٬ كان فريق من 3 الافراد ديال كود كيصور. فيهم جوج صحافيين ومصور. جاو عندكم كاع انواع الاجهزة الامنية. بسيڤيل بالكسوة. ناس السلطة والامن. كلشي كيسول. كيمشي واحد كيجي لاخر. هادا تضييق غبي على عمل الصحافيين. لا تنسيق بيناتهم لا مولاي بويه.

هاد الشي كيتم باشراف من والي مراكش اللي خلى عراسات تدار فاوطيلات بمراكش ليلة السبت 9 شتنبر اي نهار تعلن الحداد ودابا تابع الصحافة.

نفس الوالي مخلي تسيب كبير فدواوير الحوز لمن يسمون انفسهم مؤثرات ومؤثرون٬ يجيبو شي مساعدة والمقابل ديالها يصورو داك الشي وينشروه فصفحاتهم باش يربحو ضعف ما خسرو من عائدات هاد الصفحات. كيصورو الاطفال والعائلات. هادوك امثال ميمي طاق طاق وليلى حديوي وجيش من المستغلين لهاد الزلزال٬ ما كيجي عندهم لا قائد لا جدرامي لا عامل. كاين تواطؤ كبير بين هاد السلطات وبين هاد الفئة. بحال ميمي راها سبق صورات اطفال قبل وباعت صورهم. السلطة فالبلاد القضائية كنقصد٬ ما تحركاتش فهاد الملف.

دابا السلطة فمراكش متواطئة من هاد العينة. كتدعمها. كتشجعها. ما كتقربش ليها. الملايين ديال لمغاربة ضامنو مع ضحايا زلزال الحوز وتارودانت وازيلال ووارزازات… هاد الملايين ما صورو ريوسهم ما صورو الناس ما صورو اعمالهم. كاين اللي رفض حتى يقول اسمو العائلي فربورطاجات دارتها “كود” وكاين اللي رسل كثر من 30 كاميو مساعدات وحتى الشيفورات اللي هزو المساعدات ما عرفوش شكون رسلها.

اي واحد كيقول كنقدم مساعدات وكيصور راك كيبيع ويشري. كيخسر درهم باش يجيب 3 او كثر فالعائلات. تجارة فضحايا الزلزال. جمعيات المجتمع المدني فالحوز خاصها توعي الناس باش يتصداو لهاد العينة مادام السلطات متواطئة معاهم. مادام والي مراكش حاضي الصحافيين ومخلي هاد لكمامر