كود الرباط//
خرج الوالي يونس التازي، أمس الأربعاء، خلال أشغال المجلس الإداري للوكالة الحضرية المنعقد بمقر الولاية،كيدافع على الوضع السياحي فالمدينة، وقال بللي طنجة كتوفر على عرض فندقي أقوى من الرباط بثلاث مرات، وأقوى من فاس بمرتين ونص. وشرح بللي اللي كيهضرو على ضعف البنية الفندقية ’’ما كيقولووش الحقيقة كاملة”، واتهمهم بنشر ’’حق يُراد به باطل‘‘.
هاد التصريحات جاو باش يغطيو على واحد الفضيحة كبيرة اللي خرجات ف تقرير رسمي ديال الفيفا (وما أدراك ما الفيفا) لي فيه تقييم للمدن المرشحة لتنظيم مونديال 2030، وفضحات فيه الواقع المزري ديال طنجة. المدينة خدات 2.2/5 فالإيواء، و2/5 فالنقل، وجات فالمرتبة الأخيرة بين المدن المغربية. بلا ما نهضرو على تقييم ساحات المشجعين اللي بقا متوسط، وهادشي كامل فمقابل مدن بحال مراكش اللي خداو تنقيط كيقارب 5/5. وطبعا رباط حسن بكثير .
على ذكر الرباط، يمكن خاص هاد الوالي يتعلم من اليعقوبي، للي كيخدم ف تيران وفايق وعايق، ومكيديرش البوليميك مع السياسيين، ومكيديرش گصاعي د الكسكسو للعمال نهار الجمعة ويصورهم: زعما شوفوني كندير الصدقة. راه طنجة مامحتاجة لگصاعي د الكسكسو واخا هي مبادرة مزيانة وإنسانية، ولكن واش كان ضروري تصويرها وترويجها.
الوالي التازي جا اليوم باش يكذب تقرير واضح بمعايير تقنية، فالوقت لي فوزي لقجع، رئيس الجامعة الملكية ورئيس لجنة التنظيم، كان واضح ف تصريحاتو ، تقييم الفيفا مزيان للمغرب، وطبعا مدن غطات على فضيحة طنجة للي كان خاص يوجد التيران ف مارس.
لكن بلاصت مايقابل هادشي، الوالي مشا يتفطح فماربيا. نهار 19 أبريل، فوسط أزمة التقرير “الفضيحة” وتأخر المشاريع، هز حوايجو ومشا يفوج فجنوب إسبانيا، هو وعائلتو، حسب شهود شافوه فالميناء ومن بعد فالطريق بسيارتو الخاصة.
الوالي تالف ف كولشي، وحتى فـ16 ماي، نهار ذكرى تأسيس المديرية العامة للأمن الوطني، حضر التازي لاحتفالات الجديدة، ة واقف تايه وسط الحاضرين، لا كيبان فيه تالف ولا علاش جاي.
بالمختصر، الوالي يونس التازي ما فايدوش. طنجة فيها مشاريع واقفة، مؤشرات كارثية، والراجل خارج التغطية، كيعجبو يرد على السياسيين وانتقادهم، الأحزاب مفتوحة ممكن يتحزب. أما منصب والي، راه دار باختصاصات واضحة ماشي للكلاشات السياسية. يمكن الزهر لي عندو باش ما طارش من المنصب هو قربه من وزير الداخلية لفتيت.